Id-difiża u l-prosekuzzjoni bdew l-argumenti tagħhom hekk kif t-Tnejn il-Qorti kienet infurmata mill-Prosekuzzjoni li hin m’għandha l-ebda provi iktar xi tressaq fil-ġuri dwar il-qtil ta’ Neville Baldacchino ta’ 28 sena, li seħħ fid-19 ta’ Diċembru 2008. Stefan Caruana qed jiġi mixli b’dan il-qtil.
Wara li t-Tnejn xhedet l-aħħar xhud tal-prosekuzzjoni, l-mara tal-vittma, liema xhieda ngħatata bil-magħluq – u d-difiża nfurmat lill-Qorti li l-akkuża kif għandu d-dritt li jagħmel skont il-liġi mhux se jixhed bdew l-argumenti tagħhom il-partijiet involuti.
Id-difiża qed tgħid li Stephen Caruana ta’ 45 sena minn Ħal Qormi, li jinsab mixli li spara erba’ tiri ġewwa r-residenza tiegħu stess fi Triq id-Drama, li minnhom tlieta laqtu lill-vittma, inkluż tir fatali fir-ras, għamel dan għax waqt li kien rieqed f’dahru u sema’ ħoss, u osserva lill-vittma fir-residenza tiegħu sparalu, għax f’dak il-ħin – inħasad meta ra persuna bil-lejl fi ħwejjġu.
Ingħad mid-difiża li dak il-ħin l-akkużat beża’ u għalhekk spara lil Baldacchino. Minn naħa tagħha l-prosekuzzjoni qed tgħid li l-unika skop tal-akkużat kien li joqtol lill-vittma għax minkejja li rah qed jipprova jaħrab minn fuq il-post, sparalu erba’ tiri. Wara li laqtu f’saqajh u idu, spara tiri ieħor li laqtu f’rasu u anke spara r-raba’ tir li laqat ħajt. Għaldaqstant il-prosekuzzjoni qed tgħid li l-iskop ta’ Caruana kien wieħed, dak li joqtol lil Baldacchino.
Partijiet mill-provi fil-każ instemgħu bil-magħluq minħabba n-natura sensittiva tal-każ. Wara li l-prosekuzzjoni ttemm l-argumenti tagħha ssir il-kontro-replika mid-difiża u wara l-Imħallef Consuelo Scerri Herrera tagħmel l-indirizz tagħha lill-ġurati fejn tkun qed tfehmhom diversi punti tal-liġi, u wara tgħidilhom biex jidħlu jiddeliberaw.
Il-prosekuzzjoni, anke fil-Kapi tal-akkuża li ppreżentat lill-ġurati qed issostni li Caruana ppjana u wettaq b’mod intenzjonat l-att li wassal għall-mewt ta’ Baldacchino, u għalhekk xlietu b’omiċidju volontarju, reat li, jekk jinstab ħati tiegħu, jista’ jwassal għal sentenza ta’ għomor il-ħabs.
Skont il-prosekuzzjoni, l-avvenimenti li wasslu għall-qtil bdew minn relazzjoni sigrieta bejn il-vittma u mart l-akkużat, li allegatament żviluppat fi żmien meta ż-żwieġ tagħhom kien għaddej minn perjodu diffiċli. Għalkemm ir-relazzjoni kienet moħbija, Caruana kien beda jissuspetta li kien hemm xi ħaġa mhux f’postha.
Allegatament, mart l-akkużat u l-vittma ftiehmu biex jiltaqgħu fid-dar tal-familja tagħha wara li Caruana u t-tfal marru jorqdu. Skont il-verżjoni tal-prosekuzzjoni, huma kellhom relazzjoni sesswali fl-ewwel sular, taħt is-suppożizzjoni li Caruana kien rieqed.
Madankollu, l-akkużat ma kienx rieqed u, hekk kif martu niżlet isfel biex tiċċekkja fuqu u fuq it-tfal, huwa tela’ fuq armat b’arma tan-nar u spara erba’ tiri, li minnhom tlieta laqtu u qatlu lil Baldacchino. Fil-ġranet li għaddew, esperti fil-ballistika xehdu quddiem il-ġurija u ppreżentaw provi miġbura mix-xena tad-delitt. Il-qorti ntweriet diversi oġġetti mmarkati b’numri ta’ identifikazzjoni, inklużi skrataċ vojta, kaxxa ta’ skrataċ li nstabet fuq il-post u l-kaxxa li fiha kienet tinżamm l-arma.
Xhud espert spjega fid-dettall il-mekkaniżmu tal-arma u kif jaħdmu l-iskrataċ, u tenna li l-arma li ntużat hi shotgun semi-awtomatika. Il-qorti semgħet ukoll dwar testijiet li saru minn distanza ta’ madwar żewġ metri biex jiġi osservat kif jinfirxu l-pellets, u dwar il-pożizzjoni probabbli ta’ min spara fil-mument tal-isparatura.
L-esperti kkonfermaw li min spara kien jinsab bejn żewġ u tliet metri ’l bogħod mill-vittma u li Baldacchino kien ftit lejn ix-xellug. Huma esprimew l-opinjoni li l-ewwel tir laqtu f’siequ meta kien qed jitkaxkar waqt li kien qed jipprova jaħrab, għalkemm id-difiża qajmet dubji dwar jekk, fid-dawl tal-għoli tal-vittma u l-marki tad-demm misjuba fuq il-ħajt, kienx possibbli li din il-ferita seħħet meta kien wieqaf.
Xhieda oħra kkonfermat li ma jistax jiġi determinat b’ċertezza fejn jispiċċa skratoċċ wara li jiġi sparat. Uffiċjal tax-xena tad-delitt, Charles Grech, qal li swabbing li sar fuq l-arma wera li din kienet għadha kif intużat u kkonferma li l-arma murija fil-qorti kienet dik użata fil-qtil. Huwa identifika wkoll il-ħwejjeġ li kien liebes l-akkużat u kkonferma li ttieħdu kampjuni minn fuq u minn fuq il-mara tal-akkużat.
Ix-xhieda medika spjegat in-natura tal-feriti fatali li sofra Baldacchino. L-espert Mario Xerri qal li l-vittma kien ftit metri ’l bogħod mill-akkużat meta ntlaqat u spjega d-differenza bejn ferita ta’ dħul u waħda ta’ ħruġ. Huwa qal li f’dan il-każ instabet balla mwaħħla taħt il-ġilda fuq naħa ta’ spalltu, ftit ‘l isfel mill-widna.
Il-qorti semgħet kif il-vittma miet kawża ta’ tliet feriti prinċipali li ġarrab f’siequ, f’idu u f’rasu, kif ukoll feriti oħra kkawżati mill-pellets li ħarġu mill-istess tiri. Il-ġurati ntwerew pellets li kienu ħarġu mir-ras u minn id il-vittma waqt l-awtopsja. Esperti fil-ballistika ppreżentaw ukoll l-arma tan-nar li kienet instabet moħbija wara friża, u spjegaw kif taħdem.
Il-ġuri li beda nhar it-Tlieta – qed isir fis-Sala 22 tal-Qorti u qed jiġi ppresedut mill-Imħallef Consuelo Scerri Herrera. Għad-difiża qed jidhru l-avukati Gianella Demarco u Charles Mercieca, filwaqt li l-familja tal-vittma qed tkun rappreżentata mill-avukati Edward Gatt u Mark Vassallo bħala parte civile.
