Marsa St Michael telgħu fit-tieni post tal-klassifika tal-kampjonat tal-Ewwel Diviżjoni tal-MAFA meta għelbu lil Balluta Barracudas 2-1.
Kienet rebħa importanti għat-tim immexxi minn Malcolm Tirchett għalkemm kien biss lejn l-aħħar li aċċertaw ruħhom mir-rebħa finali.
Min-naħa tagħhom. Balluta Barracudas taw qalbhom tul il-logħba kollha iżda spiċċaw ħarġu bla punti minn din il-partita.
Jean Col Stiven Urbe Rico poġġa lil Marsa St Michael’s minn fuq man-nofs siegħa logħob sabiex fit-tieni taqsima, Darko Todorovski irdoppja l-iskor.
Erba’ minuti minn tmiem il-konfront, Matthew Mallia naqqas il-marġni tal-iskor għall-Cudas.
Referee kien Roderick Micallef.
San Ġwann Pro Evolution kisbu l-ewwel punti tal-istaġun wara li għelbu lil San Ġiljan Saints 3-2.
Kienu s-Saints li marru minn fuq permezz ta’ freekick mill-isbaħ ta’ Robert Veskimae sabiex Reda El Ashasi u Nino Barrabe bejn l-24 u s-26 minuta dawru l-iskor favur San Ġwann.
Tliet minuti minn tmiem l-ewwel taqsima, Pierre Cao Nathan Pham ħa vantaġġ minn żball difensiv sabiex poġġa l-ballun fix-xibka qabel ma’ Victor Sandy Pallot naqqas il-marġni tal-iskor għal San Ġiljan Saints.
Referee kien Lorry Sammut.
Fit-tieni diviżjoni, Attard Edex Kings fetħu vantaġġ ta’ tliet punti fil-klassifika wara li għelbu lil Birżebbuġa St Peter’s AFC 3-2.
Ma kinitx logħba faċli għal Attard hekk kif l-avversarji tagħhom min-naħa t’isfel ta’ Malta tawhom logħba u kien biss fl-aħħar sekondi li ċedew l-armi.
Kien Kirandas Vallikkatu li poġġa lil Attard minn fuq wara biss minuta bl-istess plejer jirdoppja l-iskor fit-33 minuta.
Fit-tieni taqsima, Birżebbuġa wettqu rimonta u ġabu l-iskor indaqs minn Ronnie Celeste fil-45 minuta u Oussama Boutayeb fis-67 minuta.
Minkejja kollox, l-aħħar kelma kienet ta’ Attard hekk kif l-aqwa skorer tal-kampjonat Lucas Carvalhom skorja l-gowl tar-rebħa minuta qabel tmiem il-partita.
Referee kien Peter Abela.
Fl-iktar partita mistennija tan-naħa ta’ fuq tal-klassifika, Swieqi United AFC u Gudja Wanderers spiċċaw fi draw ta’ 1-1.
Dan id-draw ftit serva għaż-żewġ timijiet hekk kif issa jinsabu iktar distakkati minn mal-leaders Attard.
Kienu Swieqi United AFC li marru minn fuq fit-48 minuta permezz ta’ Jean Carlos Ibarra Grueso sabiex fil-ħin mogħti żejjed mir-referee, Samuel Ramirez skorja l-gowl tad-draw għal Gudja.
Referee kien Alex Grech.
F’partita min-naħa t’isfel tal-klassifika, Naxxar Victorians u Ta’ Ġiorni Wanderers spiċċaw fi draw ta’ 0-0.
Dan ir-riżultat ftit biddel is-sitwazzjoni taż-żewġ timijiet b’Ta’ Ġiorni li baqgħu punt vantaġġ fuq l-istess Naxxarin.
Referee kien Gjorgji Bitri.
KLASSIFIKA – MAFA L-EWWEL DIVIŻJONI
Għaxaq Wolves 13; Senglea Gunners; Marsa St Michael 10; Valletta St Paul’s 8; San Ġiljan Saints 6; Valletta Stars 4; San Ġwann Pro Evolution Academy 3; Balluta Barracudas 2.
KLASSIFIKA – MAFA T-TIENI DIVIŻJONI
Attard Edex Kings 19; Gudja Wanderers 16; Swieqi United AFC 14; Ħamrun Sporting 9;.Birżebbuġa St Peter’s 8; St Paul’s Bay NMFC 6; Ta’ Ġiorni Wanderers 5; Naxxar Victorians, Mqabba Albions 4.
