Fir-rigward tal-kundizzjoni tat-temp li mistennija taqleb għall-agħar, għada t-Tnejn 26 ta’ Jannar, l-Awtorità tappella għall-kawtela fix-xogħol fuq barra, speċjalment f’siti ta’ kostruzzjoni. Xogħol viċin il-baħar għandu jiġi evitat. L-Awtorità wkoll tfakkar li temp bħal dan jista’ jwassal għal ħsarat fuq postijiet tax-xogħol. Wara għandhom isiru l-ispezzjonijiet meħtieġa mill-Project Supervisors u tekniċi tal-Health & Safety biex ħsarat li jistgħu joħolqu riskji jiġu indirizzati immedjatament, u tiġi mħarsa s-saħħa u s-sigurtà tal-ħaddiema kollha.
Bil-bidliet mistennija fil-kundizzjonijiet tat-temp u riħ qawwi, huwa kruċjali li jissaħħu l-miżuri ta’ prekawzjoni biex tiġi mħarsa s-saħħa u s-sigurtà fuq il-post tax-xogħol. Riħ qawwi jista’ joħloq perikli serji bħal skart jew materjal li jaqa’ u strutturi instabbli.
Prekawzjonijiet essenzjali tas-saħħa u s-sigurtà li għandhom jiġu osservati:
- Evita xogħol barra f’għoli jew qrib strutturi instabbli.
- Evita xogħol fuq soqfa, skaffolding jew passaġġi elevati.
- Orbot jew neħħi l-materjali, l-għodod, it-tagħmir u l-istrutturi temporanji kollha li jistgħu jiċċaqalqu.
- Żgura li s-sinjali u l-komunikazzjoni fuq is-sit jirriflettu l-kundizzjonijiet attwali.
- Żomm aċċess ċar għal emerġenzi f’kull ħin.
- Oqgħod attent qrib is-siġar, il-linji tal-elettriku u l-istrutturi temporanji.
- Avża lill-ħaddiema biex jippjanaw l-ivvjaġġar tagħhom b’attenzjoni, jallokaw iżjed ħin u jibqgħu attenti għal skart, materjal jew oġġetti li jistgħu jaqgħu qrib parkeġġi u postijiet ta’ dħul.
- Il-krejnijiet għandhom jitħallew iduru meta ma jkunux taħt superviżjoni u m’għandhomx ikollhom piżijiet sospiżi.
Għal pariri jew kjarifiki, ikkuntattja l-Helpline tal-Awtorità fuq 138.
