“Qed joħroġ ċar aktar minn qatt qabel kemm hemm bżonn ta’ Gvern ġdid, bżonn ta’ Malta ta’ għada li ma tieqafx taspira li tkun aħjar”.
Kien dan il-messaġġ ewlieni tal-President tal-Kunsill Ġenerali tal-Partit Nazzjonalista Mark Anthony Sammut meta fetaħ l-ewwel Kunsill Ġenerali politiku taħt it-tmexxija ta’ Alex Borg, din id-darba f’Għawdex.
Fid-diskors tiegħu, Mark Anthony Sammut fakkar kif kien propju lura f’April tal-2006, li sar Kunsill Ġenerali f’Għawdex, 20 sena ilu. Fejn spjega illi x-xahar li ġej, il-Partit Nazzjoanlista se jkun qed isejjaħ Konvenzjoni Ġenerali, li kienet wegħda tal-Kap tal-Partit Nazzjonalista Alex Borg sa minn qabel ma nħatar fit-tmun tal-Partit Nazzjonalista.
Il-Konvenzjoni Nazzjonali se tkun qed tistieden lit-tesserati, in-nies barra mill-Partit, is-soċjeta, korpi kostitwiti, għaqdiet u finalment il-poplu Malti u Għawdxi kollu, sabiex ikunu parteċipi fi proċess li bih ikompli jifforma ruħu l-programm elettorali tal-Partit Nazzjonalista għall-elezzjoni ġenerali li ġejja.
Mark Anthony Sammut spjega illi dan il-Kunsill Ġenerali huwa propju preludju għal din il-konvenzjoni. Fejn spjega li l-Ħadd quddiem il-Kunsill se jkunu qed jitressqu ħames mozzjonijiet li kienu diskussi fl-Assemblej Reġjonali li saru mill-Partit Nazzjonalista fl-aħħar jiem.
Fi kliem il-President tal-Kunsill Ġenerali, il-mozzjonijiet qed jiġbru l-valuri u l-prinċipji li fuqhom qed tinbena l-politika tal-Partit Nazzjonalista, u li fuqhom anke se tkun qed tinbena l-Konvenzjoni Nazzjonali.
Il-mozzjonijiet jitkellmu fuq il-kwalita tal-ħajja, u kif il-poplu Malti u Għawdxi għandu jgħix mingħajr ansjeta, b’infrastruttura u trasport effiċjenti, ħin ta’ kwalita mal-familja u bilanċ aħjar bejn ix-xogħol u l-ħajja, fost ambjent aħjar, spazji aktar miftuħa u parks għall-familji.
Fost il-ħames mozzjonijiet hemm ukoll diskussjoni dwar ġid li għandu jilħaq lil kulħadd u mhux fejn jistagħnew ftit meta l-maġġoranza jridu jlaħħqu mal-għoli tal-ħajja.
Mark Anthony Sammut spjega wkoll li l-mozzjonijiet jiddiskutu l-komunitajiet b’saħħithom, f’pajjiż li jiskopri mill-ġdid is-sabiħ li tgħix flimkien, ta’ sens ta’ identita u appartenenza lil komunita li tgħix fiha.
Dan filwaqt li se titressaq anke mozzjoni dwar Gvern li jirrispettak, Gvern li ma jigdibx lill-poplu, li ma jidħakx bih. Fejn fakkar fl-iskandlu tal-ARMS, fejn it-tmexxija tal-ARMS u l-Partit Laburista ilhom tal-inqas sena jafu fi problema fis-sistema li ħalliet eluf ta’ familji jħallsu żejjed fil-kontijiet tagħhom. Skandlu, li l-ARMS ilha taf bih, u li ma tkellimtx fuqu – għajr meta l-Partit Nazzjonalista żvela dan kollu pubblikament.
Il-President tal-Kunsill Ġenerali spjega li huwa propju minħabba skandli bħalma hu tal-ARMS, li qed joħroġ aktar ċar kemm huwa bżonn li jinbidel il-Gvern. Li Malta jkollha Gvern serju, li jaħseb fil-ġid komuni u mhux fl-interessi u l-but tiegħu biss.
Għalhekk, l-aħħar mozzjoni mressqa quddiem dan il-Kunsill hija dik li titkellem fuq Malta ta’ għada, li jkollha Gvern li jippjana fit-tul, li jaħseb f’uliedha u l-ġenerazzjonijiet li tilgħin.
Gvern li jaħseb fl-edukazzjoni li – fi kliemu stess – qatt ma jiftakrha fl-istat li qiegħda llum il-ġurnata. Gvern li jħalli lil Malta ta’ għada li ma tieqafx taspira li tkun dejjem aħjar.
Mark Anthony Sammut qal li din żgur mhux se tkun qed issir mill-Gvern preżenti, Gvern Laburista li għejja u li hu mifni bi skandli wieħed akbar mill-ieħor.
Huwa kompla billi ddikjara li Malta aħjar jista jagħmilha Gvern ġdid Nazzjonalista, u għalkemm it-triq tibqa’ għat-tela’, għalkemm il-Partit Nazzjonalista huwa l-undergod, in-numri tas-sondaġġ li ġie ppubblikat il-Ħadd juri li din saret possibbli.
Dan hu l-mument li Malta jkollha Gvern immexxi minn Prim Ministru li ma jibżax, mimli enerġija, mhux kompromess imma li jemmen fil-poplu Malti u Għawdxi.
Gvern ġdid Nazzjonalista mmexxi minn Alex Borg, li fih ħafna Maltin u Għawdxin qed jaraw tama ġdida, tama li għada jista’ jkun ħafna aħjar mil-lum.
