Mara ta’ 28 sena li m’għandhiex residenza fissa nżammet taħt arrest preventiv wara li tressqet il-Qorti akkużata li kisret ordni ta’ protezzjoni billi marret fid-dar tan-nanna tagħha, kif ukoll li kisret kundizzjonijiet tal-ħelsien mill-arrest u li hija riċediva.
Il-mara wieġbet mhux ħatja għall-akkużi kollha meta tressqet il-Qorti t-Tnejn. Quddiem il-Qorti nstema’ kif hija kienet l-ewwel immarkata mill-Pulizija bħala nieqsa milli tosserva l-kundizzjonijiet tal-bail meta naqset li tidher f’għassa tal-Pulizija biex tiffirma l-bail book kif ordnat.
Aktar tard, hija l-anqas ma dehret għal seduta oħra fil-Qorti, fatt li wassal biex inħarġu passi ulterjuri kontriha. Il-Pulizija eventwalment arrestawha fid-dar tan-nanna tagħha. Ġie spjegat li n-nanna kienet diġà għamlet diversi rapporti dwarha fil-passat u, permezz ta’ proċeduri separati, kienet ingħatat ordni ta’ protezzjoni fil-konfront tal-akkużata.
Waqt li l-Qorti kienet qed tispjegalha fid-dettall l-akkużi li kienet qed tiffaċċja, il-mara staqsiet jekk kienx possibbli li tinħareġ ordni ta’ protezzjoni “reċiproka”, jiġifieri li tapplika wkoll min-naħa tagħha. Qalet lill-Qorti li “ma għandhiex il-kuraġġ” li taqta’ t-telefonata meta n-nanna tagħha ċċemplilha.
Il-Qorti dderiġiet lill-akkużata sabiex tiddiskuti din il-kwistjoni mal-avukati tagħha. F’dan l-istadju tal-proċeduri, id-difiża ma ressqitx talba għall-ħelsien mill-arrest, u għaldaqstant il-Qorti ordnat li l-mara tinżamm taħt arrest preventiv.
Il-każ instema’ quddiem il-Maġistrat Leonard Caruana. Il-prosekuzzjoni tmexxiet mill-Ispettur Christian Cauchi, filwaqt li għall-akkużata dehru l-avukati Franco Debono u Marion Camilleri.
