Il-Kumitat għal-Libertajiet Ċivili, il-Ġustizzja u l-Intern (LIBE) illum ivvota biex japprova l-ftehim proviżorju dwar id-Direttiva tal-UE Kontra l-Korruzzjoni. Dan ifisser li l-liġi qabżet ostaklu kruċjali qabel il-vot finali li jmiss fil-plenarja.
Il-liġi l-ġdida, li għaliha l-MEP David Casa serva bħala n-negozjatur ewlieni tal-Grupp tal-PPE, hija l-aktar direttiva ambizzjuża maħsuba biex tarmonizza liġijiet kriminali kontra l-korruzzjoni madwar l-UE.
Id-direttiva tistabbilixxi definizzjonijiet komuni għal reati bħal tixħim, miżapproprjazzjoni, u abbuż tal-funzjonijiet, filwaqt li tistabbilixxi standards obbligatorji għall-pieni u l-perjodi ta’ preskrizzjoni. Pakkett ta’ prevenzjoni jobbliga lill-Istati Membri jintroduċu miżuri kumplimentari biex jipprevjenu u jindirizzaw il-korruzzjoni u r-riskji tagħha.
F’kumment wara l-vot, Casa qal li “llum hija rebħa fil-ġlieda kontra l-korruzzjoni, u pass eqreb lejn liġi b’saħħitha li se ssaħħaħ dik il-ġlieda madwar l-Unjoni Ewropea. Dan it-test huwa r-riżultat ta’ xhur ta’ negozjati li raw lill-Parlament jirrifjuta ftehimiet preċedenti favur standards aktar ambizzjużi kontra l-korruzzjoni. Illum, ninsabu pass eqreb biex inwassluhom.”
