Sid ta’ ħanut ta’ 42 sena ġie miċħud il-libertà proviżorja wara li wieġeb mhux ħati għal akkużi serji ta’ stupru fuq minorenni. Il-każ instema’ quddiem il-Maġistrat Elaine Rizzo, li ordnat li r-raġel jinżamm taħt arrest preventiv.
L-Ispettur tal-Pulizija John Spiteri spjega li l-Vice Squad kienet irċeviet rapport f’Ottubru mingħand l-aġenzija Appoġġ dwar żewġ minorenni li kienu jinsabu fil-kura tal-Istat. Skont ir-rapport, iż-żewġ tfajliet kienu jqattgħu ħafna ħin ma’ adult, identifikat bħala Sifeddin Saleh Et Twir, ċittadin Libjan residenti Malta, li miegħu kienu jikkunsmaw il-kannabis.
Il-Pulizija tkellmet mat-tfajliet f’diversi okkażjonijiet u kien biss fit-tieni intervista li huma allegaw li kienu vittmi ta’ abbuż sesswali u użu tad-droga. L-investigazzjonijiet wrew li l-akkużat kien jeħodhom jew fir-residenza tiegħu jew fil-karozza, fejn allegatament kien jabbużahom sesswalment. Ġie spjegat ukoll li l-abbuż fuq waħda mill-minorenni kien seħħ fil-preżenza tal-oħra.
L-akkużat ġie arrestat nhar it-Tnejn. Fil-Qorti, l-avukat difensur Franco Debono ssuġġerixxa li r-raġel kien diġà fuq libertà proviżorja mill-Pulizija, iżda kemm l-Ispettur Spiteri kif ukoll l-Ispettur Dorianne Tabone ċaħdu dan, u qalu li l-ġurnata ta’ qabel kienet l-ewwel darba li tkellmu miegħu dwar dan il-każ.
Aktar tard irriżulta li l-akkużat qed jiġi investigat ukoll b’rabta ma’ allegazzjonijiet separati ta’ stupru fuq persuna adulta. Wara li wieġeb mhux ħati għall-akkużi, id-difiża talbet il-libertà proviżorja. Madankollu, l-avukat tal-Avukat Ġenerali Michael Muscat oġġezzjona bil-qawwa, billi sostna li għad hemm diversi xhieda x’jixhdu, fosthom minorenni vulnerabbli.
Huwa qal ukoll li, skont l-allegazzjonijiet, l-akkużat kien ilu aktar minn sena jrabbi relazzjoni ta’ grooming mal-allegati vittmi u hemm riskju serju ta’ tbagħbis tal-provi. L-avukat Debono nnota li r-rapport inizjali kien sar f’Ottubru 2025, iżda l-Ispettur Spiteri ċċara li dak iż-żmien il-Pulizija kienet irċeviet biss riferenza mingħand is-servizzi soċjali, u li l-minorenni kienu rrifjutaw li jagħtu kwalunkwe informazzjoni.
Huwa enfasizza li t-tfajliet għandhom problema ta’ droga u li kien biss madwar ġimagħtejn ilu li bdew jiżvelaw parti mill-allegazzjonijiet, u komplew jagħmlu dan wara l-arrest tal-akkużat. Id-difiża argumentat li l-Pulizija kienet taf bl-allegat abbuż minn Ottubru u staqsiet x’kien sar f’dak il-perjodu, filwaqt li sostniet li ma kienx ċar kif l-akkużat seta’ jinterferixxi mal-provi.
Wara li semgħet is-sottomissjonijiet kollha, il-Qorti ċaħdet it-talba għall-libertà proviżorja u ordnat li r-raġel jinżamm taħt arrest preventiv. Il-prosekuzzjoni tmexxiet mill-avukati tal-Avukat Ġenerali Michael Muscat u Charmaine Abdilla, assistiti mill-Ispetturi John Spiteri u Dorianne Tabone, filwaqt li Franco Debono u Tiziana Micallef dehru għad-difiża.
