Ilbieraħ, il-KSU wettaq il-wegħda tiegħu li jinvolvi ruħu b’mod aktar dirett fl-azzjoni industrijali li għaddejja bejn l-UMASA (l-Għaqda tal-Lecturers Universitarji), il-Ministeru għall-Edukazzjoni u l-Università. It-talba tal-KSU għal laqgħa wiċċ imb wiċċ bejn rappreżentanti tal-KSU u tal-Ministeru għall-Edukazzjoni ġiet aċċettata, u din il-laqgħa saret dalgħodu.
Matul din il-laqgħa, il-KSU ddiskuta l-istat attwali tan-negozjati bejn il-partijiet involuti fit-tilwima industrijali u esprima t-tħassib tiegħu dwar id-direttivi li nħarġu reċentement, li jistgħu potenzjalment iwasslu għal dewmien fil-pubblikazzjoni tar-riżultati tal-eżamijiet ta’ dan is-semestru. F’dan ir-rigward, il-KSU esprima t-tħassib tiegħu lill-Ministru dwar il-progress bil-mod li sar s’issa u enfasizza li kwalunkwe żieda fis-salarji tal-letturi li tirriżulta minn dan il-ftehim kollettiv għandha idealment tkun koperta minn żieda proporzjonata fil-finanzjament mill-Gvern, sabiex ma jinħolqux pressjonijiet addizzjonali fuq ir-riżorsi limitati tal-Università. B’mod partikolari, hekk kif l-istudenti qed jiġu affettwati direttament, il-KSU appella bil-qawwa kemm mal-Ministru kif ukoll mal-UMASA sabiex isir kull sforz possibbli biex tinstab soluzzjoni malajr għal din il-kwistjoni.
Il-Ministru Clifton Grima informa lill-KSU li għal għada hija skedata laqgħa ta’ konċiljazzjoni bejn il-partijiet, fejn il-partijiet kollha se jiltaqgħu sabiex jippruvaw jilħqu qbil.
Il-KSU se jagħti perjodu raġonevoli ħafna ta’ seba’ ġimgħat sabiex il-partijiet ikunu jistgħu jilħqu ftehim. Dawn is-seba’ ġimgħat jirrappreżentaw il-perjodu li normalment jieħu biex l-istudenti jirċievu l-marki finali tagħhom għas-semestru. Għaldaqstant, il-partijiet fit-tilwima qed jingħataw l-itwal żmien possibbli biex jintlaħaq ftehim. Madankollu, lil hinn minn dan il-perjodu, il-KSU se jagħmel dak kollu li huwa fil-poter tiegħu sabiex jiżgura li l-istudenti ma jiġux affettwati b’mod negattiv, meta mqabbel mas-snin preċedenti, minħabba kwistjoni li hija kompletament barra mill-kontroll tagħhom.
F’każ li ma tinstab l-ebda soluzzjoni, il-KSU se jeskala l-involviment tiegħu permezz ta’ azzjonijiet li huma legalment disponibbli għalih.
