Il-Qorti tal-Appell ikkonfermat sentenza mogħtija mill-Maġistrat Rachel Montebello, llum Imħallef – f’Lulju li għadda, li biha l-istorjografu u blogger Simon Mercieca nstab ħati li mmalafama lill-attivist kontra l-korruzzjoni Manuel Delia. L-appell tressaq minn Mercieca, iżda ġie miċħud fl-intier tiegħu, bil-Qorti tikkonferma s-sentenza kollha tal-ewwel istanza u tordna li l-ispejjeż tal-proċeduri fiż-żewġ istanzi jitħallsu mill-appellant.
Fis-sentenza tagħha, il-Qorti tal-Maġistrati kienet ordnat lil Mercieca jħallas €1,000 f’danni lil Delia għall-malafama, kif ukoll €300 oħra bħala multa amministrattiva minħabba li naqas milli josserva d-dispożizzjonijiet tal-Att dwar il-Midja u l-Malafama. Il-kawża kienet ir-riżultat ta’ battalja legali li damet sentejn, marbuta ma’ sensiela ta’ artikli ppubblikati fuq is-sit elettroniku “Simon Mercieca’s Free Press” f’Lulju tal-2023.
Il-Qorti tal-Appell osservat li l-leġiżlatur ta l-atitudni wiesgħa lill-qrati sabiex jiddeċiedu jekk dikjarazzjoni hijiex ta’ interess pubbliku jew le. Filwaqt li Mercieca sostna li l-ewwel Qorti żbaljat meta ddeċidiet li s-suġġett seta’ jkun ta’ interess pubbliku iżda l-opinjoni tiegħu ma kinitx, il-Qorti tal-Appell enfasizzat li l-kwistjoni ewlenija ma kinitx in-natura tas-suġġett, iżda l-karattru diffamatorju tad-dikjarazzjonijiet infushom.
Skont il-Qorti, dikjarazzjonijiet li jattakkaw ir-reputazzjoni ta’ individwu, u li jiġu ppubblikati bosta snin wara li l-persuna tkun temmet kariga pubblika, bilkemm jistgħu jitqiesu bħala fl-interess pubbliku ġenerali.
Il-Qorti qalet li l-artikli pinġew lil Delia bħala persuna ipokrita, li allegatament użat il-kariga pubblika tagħha biex taġevola interessi finanzjarji personali, u saħansitra akkużawh b’kondotta “mafjuża”. Dawn id-deskrizzjonijiet, skont il-Qorti, setgħu jissodisfaw il-kurżità ta’ ċertu qarrejja, iżda ma kinux jissodisfaw ir-rekwiżit legali tal-interess pubbliku.
Għaldaqstant, id-difiża tal-“opinjoni onesta” ma setgħetx tirnexxi, peress li kienet ibbażata fuq dikjarazzjonijiet mhux ivverifikati u assunzjonijiet aktar milli fuq fatti stabbiliti. Il-każ ta’ malafama kien inqala’ wara allegazzjonijiet ta’ Mercieca li Delia kien waqqaf b’mod deliberat negozjati li allegatament kellhom iwasslu biex il-Mediterranean Film Studios tal-Kalkara jiġu ttrasferiti lil Keith Schembri, l-eks chief of staff tal-Prim Ministru Joseph Muscat.
Skont Mercieca, dan kien seħħ fl-2007, meta Delia kien qed iservi bħala konsulent tal-Ministru Nazzjonalista Austin Gatt. Il-Qorti, madankollu, sabet li dawn l-allegazzjonijiet ma kinux sostnuti b’ebda prova konkreta, u li s-sorsi msemmija minn Mercieca ma kellhomx għarfien dirett tal-fatti.
Il-Qorti aċċettat ukoll ir-raġunament tal-ewwel istanza li, għalkemm dikjarazzjonijiet individwali jistgħu ma jkunux diffamatorji waħedhom, meta jinqraw flimkien joħolqu stampa li tagħmel ħsara serja lir-reputazzjoni ta’ Delia bħala attivist kontra l-korruzzjoni. Hija enfasizzat li imputazzjoni li uffiċjal pubbliku kien rgħib jew aġixxa b’mod mafjuż hija intrinsikament diffamatorja.
Għal dawn ir-raġunijiet kollha, il-Qorti tal-Appell iddeċidiet li tiċħad l-appell ta’ Mercieca u tikkonferma s-sentenza tat-3 ta’ Lulju 2025 fl-intier tagħha.
