Il-Partit Nazzjonalista jesprimi solidarjetà sħiħa ma’ dawk kollha li ġew u qed jiġu affettwati b’dak li qed jiġri f’Santa Venera u ma’ kull min isib ruħu milqut direttament jew indirettament f’każi simili.
Fl-istess waqt, il-Partit Nazzjonalista jirringrazzja lill-Awtorità tal-Bini u l-Kostruzzjoni (BCA), l-Awtorità għas-Saħħa u s-Sigurtà fil-Post tax-Xogħol (OHSA), lill-periti, l-inġiniera, il-professjonisti kollha u lill-persuni tekniċi li intervjenew fil-ħin, b’dedikazzjoni u b’sens qawwi ta’ responsabbiltà. Ir-rispons u x-xogħol tagħhom kien kruċjali biex jiġu mħarsa l-ħajjiet u biex tinżamm is-sigurtà f’mumenti ta’ tensjoni u inċertezza.
Dan l-inċident, għal darba oħra jerġa’ jfakkarna kemm hu importanti li pajjiżna jkompli jsaħħaħ il-prevenzjoni u l-għarfien xjentifiku dwar dak li qed jiġri taħtna. Huwa għalhekk li l-Partit Nazzjonalista jerġa’ jenfasizza l-ħtieġa li pajjiżna jkollu National Geological Office li jkun responsabbli biex jiġbor u jżomm data ġeoloġika nazzjonali, joħloq database ċentrali tas-subsoil, janalizza r-riskji marbuta mal-iskavar u l-pedamenti, jipprovdi gwida teknika lill-awtoritajiet u lill-professjonisti, u jikkontribwixxi għal ippjanar u kostruzzjoni aktar siguri u sostenibbli.
Dan l-uffiċċju mhuwiex biss investiment fis-saħħa u s-sigurtà, iżda wkoll investiment għaqli li jgħin biex jipprevieni u jnaqqas il-ħsarat u l-ispejjeż fit-tul, iżid iċ-ċertezza għall-investituri u għat-terzi u jtejjeb il-kwalità tal-proġetti. B’aktar għarfien u koordinazzjoni xjentifika, pajjiżna jkun jista’ jimxi lejn żvilupp aktar responsabbli, bi ppjanar aħjar u standards ogħla fid-disinn u fl-eżekuzzjoni tal-proġetti, speċjalment f’kuntest ta’ densifikazzjoni urbana u skavar dejjem akbar.
Pajjiż b’intensità għolja ta’ kostruzzjoni bħal tagħna ma jistax jibqa’ mingħajr infrastruttura xjentifika nazzjonali li tifhem, tissorvelja u tiggwida l-użu tas-sotterran tiegħu. Dan huwa pedament essenzjali biex immorru minn sistema li tirreaġixxi wara l-problemi għal waħda li tipprevenihom qabel ma jseħħu.
Il-Partit Nazzjonalista jibqa’ jinsisti fuq il-ħtieġa li Malta jkollha Single Construction Law – qafas legali wieħed, integrat u preventiv li jirregola l-kostruzzjoni tul iċ-ċiklu kollu tagħha. F’dan il-kuntest, il-ġeoloġija u d-data xjentifika ma jkunux żejda, iżda parti fundamentali mid-deċiżjonijiet li jittieħdu qabel ma jibda x-xogħol fuq sit.
It-twaqqif ta’ National Geological Office, għalhekk, għandu jkun pilastru importanti f’sistema moderna ta’ governanza tal-kostruzzjoni bbażata fuq prevenzjoni aktar milli reazzjoni, fuq ċarezza u responsabbiltà aktar milli frammentazzjoni, u fuq l-interess pubbliku u s-sigurtà tan-nies fuq kollox.
Il-Partit Nazzjonalista jibqa’ jipproponi għodod importanti biex nipproteġu aktar il-ħajja tan-nies u nibnu futur aktar sigur u sostenibbli għal kulħadd.
Dan intqal fi stqarrija ffirmata mix-Shadow Minister għall-Ippjanar u l-Artijiet Stanley Zammit u x-Shadow Minister għall-Intern u s-Siġurtà Darren Carabott.
