Waqt id-dibattitu fil-Parlament dwar l-implimentazzjoni tal-miżuri tal-Budget 2026, il-Kap tal-Oppożizzjoni u tal-Partit Nazzjonalista Alex Borg illejla saħaq li l-kejl veru ta’ pajjiż ma jsirx bil-grafika, in-n-numri jew bl-istqarrijiet, iżda bil-kwalità tal-ħajja tan-nies.
Huwa sostna li l-politika trid titlaq mir-realtà li qed jgħixu l-familji Maltin u Għawdxin – familji li jaħdmu u xorta ma jaslux, żgħażagħ li jħossuhom imwaħħlin, u anzjani li jibdew jiddubitaw jekk il-pensjoni hix se twassal sal-aħħar tax-xahar.
Ir-realtà li qed iħossu n-nies
Il-Kap tal-Oppożizzjoni enfasizza li l-problemi li qed iħossu n-nies huma konkreti u ta’ kuljum:
- Sigħat twal mitlufa fit-traffiku, li jisirqu ħin prezzjuż mill-familji,
- Għoli tal-ħajja li qed jikkonsma l-pagi malli jidħlu,
- Pressjoni kontinwa biex jaħdmu aktar sigħat u jagħmlu aktar sagrifiċċji,
- Inqas stabbiltà u inqas serħan il-moħħ.
Huwa qal li din mhijiex perċezzjoni, iżda r-realtà ta’ min jaħdem bis-serjetà, iħallas it-taxxi tiegħu u xorta jħoss li qed jibqa’ lura.
Mudell li tilef il-bilanċ
Alex Borg sostna li l-problema mhijiex in-nuqqas ta’ riżorsi, iżda li l-pajjiż tilef il-bilanċ. Filwaqt li hemm tkabbir ekonomiku, dan mhux qed jissarraf biżżejjed fi kwalità ta’ ħajja aħjar.
Huwa wissa li għandna mudell ekonomiku li jitlob ħafna u jagħti lura ftit – mudell li qed jikkonsma l-ħin tal-familji, iżid il-pressjoni mentali u jnaqqas il-kwalità tal-ħajja. Mudell li qed iġiegħel lin-nies jgħixu biex jaħdmu, flok jaħdmu biex jgħixu. Dan, saħaq, mhuwiex sostenibbli la ekonomikament u lanqas soċjalment.
Il-Kap tal-Oppożizzjoni fakkar li r-responsabbiltà finali għall-implimentazzjoni tal-miżuri tal-budget hija tal-Gvern tal-ġurnata, iżda sostna wkoll li l-Oppożizzjoni għandha d-dmir li mhux biss tidentifika l-problemi, iżda toffri soluzzjonijiet konkreti.
Ħames prijoritajiet ċari u prattiċi
F’dan il-kuntest, il-Kap tal-Partit Nazzjonalista Alex Borg ippreżenta ħames prijoritajiet ewlenin:
- Ekonomija li tgħolli l-kwalità tax-xogħol – inqas dipendenza fuq sigħat twal, aktar investiment fil-ħiliet u f’setturi ta’ valur miżjud, u pagi li jlaħħqu mal-ħajja;
- Għajnuna effettiva kontra l-għoli tal-ħajja – miżuri li jinħassu fil-bwiet ta’ min jaħdem u ta’ min hu vulnerabbli, mhux simboliżmu;
- Politika ta’ akkomodazzjoni li taħdem għan-nies – biex iż-żgħażagħ u l-familji jkunu jistgħu jippjanaw il-futur tagħhom b’ċertezza;
- Edukazzjoni li tħejji għall-ħajja – sistema li tagħti ħiliet, flessibbiltà u opportunitajiet reali lill-ġenerazzjonijiet li ġejjin;
- Sistema tas-saħħa li tpoġġi lill-pazjent fiċ-ċentru – servizzi li jaslu fil-ħin u pjan serju biex tiġi indirizzata s-saħħa mentali bl-azzjonijiet, mhux bil-kliem.
Huwa sostna li dawn mhumiex slogans, iżda soluzzjonijiet realistiċi u fattibbli.
Politika mibnija fuq il-valuri
Fl-intervent tiegħu, Alex Borg enfasizza li l-politika trid terġa’ tkun mibnija fuq il-ġustizzja, id-dinjità u l-futur.
Ġustizzja biex ħadd ma jaqa’ lura. Dinjità biex ix-xogħol jerġa’ jagħti ħajja u mhux jisraqha. Futur biex uliedna jagħżlu li jibqgħu hawn, jaħdmu hawn u jibnu l-familji tagħhom hawn.
Huwa temm jgħid li Malta tista’ tagħmel aħjar, għax in-nies jistħoqqilhom aħjar – politika li tisma’, tifhem u twettaq.
Il-Partit Nazzjonalista, qal il-Kap tal-Oppożizzjoni, lest jerfa’ r-responsabbiltà b’serjetà, b’għaqal u b’fiduċja sħiħa fil-poplu Malti u Għawdxi, b’direzzjoni ċara għal Malta ’l Quddiem.
