Frank Schembri, ta’ 30 sena minn Tas-Sliema, u Milena Debono, ta’ 37 sena mill-Fgura, tressqu l-Qorti l-Ġimgħa waranofsinhar akkużati li wettqu serqa armata li fiha raġel spiċċa biex weġġa’ gravament b’sikkina.
Debono ġiet akkużata li kkawżat ġrieħi gravi lill-allegat vittma, li kienet fil-pussess ta’ sikkina u ġarritha magħha fil-pubbliku, kif ukoll li użat arma proprja waqt is-serqa. Hija ġiet akkużata wkoll li kienet qed titlajja għall-prostituzzjoni u li kisret kundizzjonijiet tal-ħelsien mill-arrest. It-tnejn ġew akkużati flimkien b’serqa aggravata bil-vjolenza, bil-ħin u bil-valur, li kkawżaw lill-vittma biża’ li kienet se tintuża vjolenza kontrih, kif ukoll li heddewh u insulentawh.
Schembri, li jaħdem bħala kaħħal, u Debono wieġbu mhux ħatja tal-akkużi miġjuba kontrihom. L-Ispettur tal-Pulizija Lydon Zammit spjega li fil-11 ta’ Frar, għall-ħabta tat-3am, il-Pulizija ġew infurmati b’serqa armata fil-Gżira. Fuq il-post instab ir-raġel imweġġa’.
Iċ-ċittadin Indjan qal lill-Pulizija li kienu involuti raġel u mara, u allega li l-mara attakkatu b’sikkina. Ir-raġel ittieħed l-isptar minħabba li sofra ġrieħi f’dahru, f’għonqu u fil-pala ta’ idu. Il-ġrieħi ġew iċċertifikati bħala gravi.
Il-vittma allegata qal lill-Pulizija li madwar siegħa qabel l-inċident, il-mara – li aktar tard ġiet identifikata bħala Debono – għamlet avvanzi sesswali fuqu fi ġnien fil-Gżira u serqitlu l-mobile. Hu segwiha, iżda hija ltaqgħet ma’ raġel, li aktar tard ġie identifikat bħala Schembri.
Meta kkonfrontahom dwar il-mobile tiegħu, huma talbuh €50 biex jirritornawhulu. Ir-raġel urihom li ma kellux flus, u huma serqulu l-passaport minflok. Hu rnexxielu jieħu lura l-passaport u pprova jaħrab, iżda Debono allegatament laqtitu f’dahru b’sikkina.
Filmati u CCTV kkonfermaw l-inċident, inkluż l-użu ta’ sikkina. Is-suspettati ġew identifikati mill-filmati u nħareġ mandat ta’ arrest. Sussegwentement ġew arrestati mill-Pulizija. F’dan l-istadju ma saritx talba għall-ħelsien mill-arrest, iżda d-difiża talbet li l-mara titħalla tiffirma kuntratt mal-Housing Authority.
It-tnejn inżammu arrestati. Il-każ instema’ quddiem il-Maġistrat Antoine Agius Bonnici. L-avukati Franco Debono u Marion Camilleri assistu lil Debono, filwaqt li l-Avukat Yanica Barbara assistiet lil Schembri.
