Inġinier tas-softwer ta’ 32 sena ammetta fil-qorti li seraq source code mill-kumpanija tal-kripto-muniti li kien jaħdem magħha. Ir-raġel, li ma jistax jissemmma b’ordni tal-qorti, wieġeb ħati għal diversi akkużi fosthom li uża kompjuter illegalment biex jaċċessa data, software jew dokumentazzjoni relatata, kif ukoll li għamel użu minn kopji jew immodifika tali data. L-akkuża kienet aggravata mill-fatt li kien impjegat mal-kumpanija.
Is-‘source code’ huwa sett ta’ istruzzjonijiet li jikkontrollaw programm ta’ software. Dan huwa protett bid-drittijiet tal-awtur u s-serq tiegħu jista’ jikkomprometti data tal-kumpanija jew tal-utenti. Qabel bdiet is-seduta, l-avukat difensur Christian Camilleri talab biex is-seduta ssir bil-bibien magħluqa, billi sostna li l-każ kien relatat maċ-ċiber-sigurtà tal-kumpanija, li hija l-vittma f’dan il-proċess.
Dr. Camilleri insista li l-kumpanija ma riditx li d-dettalji jsiru pubbliċi minħabba ħsara irreparabbli li tista’ ssofri. Huwa enfasizza wkoll li l-akkużat ikkoopera bis-sħiħ mal-pulizija u li dan l-inċident saħansitra għen biex titjieb is-sigurtà tal-kumpanija.
L-avukat parte civile Stefano Filletti qal li biżżejjed ikun hemm projbizzjoni fuq l-ismijiet, iżda ma kienx hemm bżonn li s-seduta ssir bil-bibien magħluqa. Il-qorti ordnat projbizzjoni fuq l-ismijiet tal-akkużat u tal-kumpanija involuta.
L-Ispettur tal-Pulizija Marcus Cachia spjega li l-pulizija rċeviet rapport kriminali mill-kumpanija li allegat abbuż ta’ sistemi informatiċi. L-investigazzjonijiet wrew li s-suspettat kien barra minn Malta u kellu jirritorna fis-16 ta’ Frar.
Hu ġie arrestat fl-Ajruport Internazzjonali ta’ Malta mal-wasla tiegħu u tressaq il-qorti nhar l-Erbgħa. Fil-qorti, l-inġinier DevOps ammetta l-akkużi miġjuba kontrih. Is-sentenza se tingħata f’data aktar tard, peress li l-pulizija għadha qed tivvaluta l-ħsara kkawżata mis-serq.
Il-prosekuzzjoni ma oġġezzjonatx għall-ħelsien mill-arrest taħt kundizzjonijiet ta’ pleġġ. Il-qorti laqgħet it-talba għall-pleġġ kontra depożitu ta’ €500 u garanzija personali ta’ €50,000. Huwa ġie ordnat jiffirma l-għassa tliet darbiet fil-ġimgħa.
Il-każ ġie differit għal Marzu. Is-seduta kienet preseduta mill-Maġistrat Gabriella Vella. Il-prosekuzzjoni tmexxiet mill-Avukat Ġenerali Mauro Abela, assistit mill-Ispettur Marcus Cachia. L-akkużat kien assistit mill-Avukat Christian Camilleri, filwaqt li l-kumpanija kienet rappreżentata mill-Avukat Stefano Filletti.
