Raġel ta’ 44 sena minn tal-Pietà ġie meħlus minn akkużi ta’ kaċċa illegali u pussess illegali ta’ arma tan-nar wara li l-Qorti tal-Maġistrati ddeċidiet li l-prosekuzzjoni naqset milli tipprova l-każ lil hinn minn kull dubju raġonevoli.
Joseph Attard kien akkużat b’rabta ma’ allegat inċident li seħħ fl-20 ta’ Settembru 2020 għall-ħabta tas-6.10pm f’Ħal Għaxaq. Skont il-prosekuzzjoni, l-imputat kien qed jikkaċċja jew jipprova jikkaċċja għasafar barra mill-istaġun permess u kien qed iġorr arma tan-nar u munizzjon mingħajr il-liċenzja meħtieġa.
Il-każ tal-prosekuzzjoni kien ibbażat prinċipalment fuq ix-xhieda ta’ Fiona Burrows u Chris Cachia Zammit, li qalu li semgħu tiri u aktar tard raw lill-imputat bilqiegħda f’għalqa b’dak li ddeskrivew bħala shotgun b’silencer. Filmati ppreżentati fil-Qorti wrew lill-imputat f’żona rurali juża tromba, b’oġġett twil maġenbu.
Madankollu, il-Qorti osservat li minkejja li seta’ kien hemm suspett qawwi li l-oġġett kien arma tan-nar, suspett, ikun kemm ikun qawwi, ma jammontax għal prova lil hinn minn kull dubju raġonevoli. L-oġġett fil-filmati ma setax jiġi identifikat b’mod konklużiv bħala arma, u lanqas ma kien hemm xhieda li raw lill-imputat jispara.
Il-Qorti nnutat ukoll inkonsistenzi fix-xhieda dwar kemm instemgħu tiri. Barra minn hekk, affidavits ta’ uffiċjali tal-Pulizija kienu tneħħew mill-atti b’digriet tal-Qorti f’Novembru 2025 minħabba difetti proċedurali. Mingħajr dawn l-affidavits, ma kien hemm l-ebda prova ammissibbli dwar jekk Attard kellux xi arma rreġistrata f’ismu.
Fid-dawl ta’ dawn in-nuqqasijiet evidenzjarji, il-Maġistrat Ann Marie Thake iddeċidiet li l-prosekuzzjoni ma laħqitx l-oneru tal-prova u meħluset lill-imputat minn kull akkuża. L-Avukati Nicholas Mifsud u Charlton Cascun dehru għad-difiża, filwaqt li l-prosekuzzjoni tmexxiet mill-Ispettur Elliot Magro.
