Clint Mangion ġie kkundannat 18-il xahar priġunerija effettiva wara li ammetta li pprova jisraq minn stabbiliment kummerċjali f’Birkirkara u li żamm lil persuna kontra l-volontà tagħha waqt l-istess inċident. Is-sentenza ngħatat mill-Maġistrat Ingrid Bianco.
L-inċident seħħ fit-30 ta’ Jannar 2026 bejn id-9:30 u l-10:00 ta’ filgħodu fl-istabbiliment Golden Harvest fi Triq il-Wied, Birkirkara. Mangion kien akkużat li, bil-ħsieb li jisraq, ta bidu għall-eżekuzzjoni ta’ dan id-delitt, li ma twettaqx minħabba ċirkostanzi indipendenti mill-volontà tiegħu.
L-akkużi jinkludu wkoll li arresta jew żamm lil Stefan Apap kontra l-volontà tiegħu bil-ħsieb ta’ estorsjoni, li ġarr sikkina mingħajr liċenzja u li għamel theddid jew inġurji. Barra minn hekk, kien akkużat bħala reċediv minħabba sentenzi preċedenti.
Fis-seduta tal-10 ta’ Frar 2026, Mangion irreġistra ammissjoni għall-akkużi kollha. Il-Qorti wissietu formalment dwar il-konsegwenzi legali tal-ammissjoni u tatu żmien biex jikkonsulta mal-avukat tiegħu. Meta l-kawża reġgħet issejħet, huwa kkonferma l-ammissjoni tiegħu. Il-Qorti ma sabet l-ebda raġuni biex tiddubita li l-ammissjoni kienet volontarja u konsegwentement sabitu ħati tal-akkużi kollha.
Filwaqt li qieset in-natura serja tar-reati, il-Qorti ħadet inkunsiderazzjoni wkoll l-ammissjoni bikrija tiegħu, il-kollaborazzjoni mal-awtoritajiet u l-fedina penali li, għalkemm mhijiex netta, ma ġietx meqjusa allarmanti.
Mangion ġie kkundannat għal 18-il xahar ħabs effettiv, li minnhom jitnaqqas kull żmien li qatta’ taħt arrest preventiv, kif ukoll multa ta’ €116.47. Il-Qorti ħarġet ukoll Ordni ta’ Trażżin għal tliet snin għall-protezzjoni tal-parti leża, Stefan Apap, u spjegat lill-imputat il-konsegwenzi jekk jikser din l-ordni, li jistgħu jwasslu għal multa ta’ €7,000 jew sa sentejn priġunerija.
Barra minn hekk, minħabba problemi ta’ abbuż ta’ droga u vizzji oħra, il-Qorti poġġiet lil Mangion taħt Ordni ta’ Trattament għal perjodu ta’ tliet snin, bil-kundizzjonijiet stipulati f’digriet separat anness mas-sentenza.
