Wara s-suċċessi kbar fl-edizzjonijiet preċedenti tas-Summer LUST Music Festival, li laqa’ artisti ta’ fama internazzjonali bħal Anastacia, Gigi D’Alessio, Chris Norman u Umberto Tozzi, l-organizzaturi qed jerġgħu jippreżentaw programm eċċezzjonali għall-2026.
Din is-sena, Ħal Għaxaq se jerġa’ jixgħel b’żewġ kunċerti spettakolari fil-15 u t-22 ta’ Mejju f’Għaxaq Grounds. Kunċerti li jwiegħdu esperjenza indimentikabbli għal dawk kollha li jħobbu l-mużika. Il-festival jagħlaq fit-23 ta’ Mejju bil-gran finali — Summerlust 90’s Edition — meqjus bħala l-avveniment ewlieni tal-mużika tas-snin disgħin f’Malta.
Fl-ewwel lejl, propju fil-15 ta’ Mejju, il-leġġendarja Kim Wilde, il-vuċi ikonika tas-snin tmenin, ser tkun qed tiftaħ dan il-festival. Hija kisbet fama internazzjonali fl-1981 bil-kanzunetta Kids in America, u malajr saret waħda mill-aktar artisti influwenti tad-deċennju. B’suċċessi kbar bħal You Keep Me Hangin’ On, Cambodia, You Came u Never Trust a Stranger, hija biegħet aktar minn 30 miljun diska madwar id-dinja.
Il-pubbliku jista’ jistenna spettaklu mimli kanzunetti klassiċi u enerġija li għamlitha stilla internazzjonali. Id-dħul huwa bla ħlas, b’donazzjonijiet miġbura mal-bieb b’risq Dar Bjorn. Dawk li jixtirqu postijiet iktar komdi u biljetto VIP jistghu jakkwistaw il-biljett taghhom fuq www.showshappening.com.
L-ispettaklu jkompli fit-22 ta’ Mejju bil-kantanta mahbuba Bonnie Tyler. Magħrufa għall-vuċi distintiva tagħha, l-istilla minn Wales kisbet suċċess kbir madwar id-dinja b’kanzunetti ikoniċi bħal Total Eclipse of the Heart, It’s a Heartache, Holding Out for a Hero, Lost in France, More Than a Lover, Bitterblue u If I Sing You a Love Song.
B’karriera li tinfirex fuq aktar minn 50 sena, hija għadha waħda mill-aktar vuċijiet rikonoxxibbli fil-pop u r-rock. Id-dħul għal din il-lejla huwa wkoll bla ħlas, b’donazzjonijiet miġbura fil-bieb b’risq Dar is-Sebħ. Biljetti VIP u bilqiegħda jinsabu għall-bejgħ minn fuq www.showshappening.com.
Summer LUST Music Festival 2026 iwiegħed ċelebrazzjoni straordinarja ta’ mużika u talent impekkabbli. Aktar informazzjoni tinsab fuq il-paġna uffiċjali ta’ Facebook, Summer Lust Għaxaq Music Events. Titlifx din l-opportunità unika biex tara żewġ artisti maħbuba Ewropej live f’Ħal Għaxaq f’Mejju li ġej.
Dan il-kunċert qed jiġi organizzat bl-appoġġ ta’ Arts Council Malta, Festivals Malta u l-Awtorita Maltija tat-Turizmu.
