Għalliem ta’ 66 sena minn Ħaż-Żebbuġ wieġeb mhux ħati għal akkużi serji li allegatament abbuża sesswalment minn studenta minorenni waqt lezzjonijiet tal-privat tul perjodu ta’ ħames snin. Fil-Qorti ntqal kif fit-13 ta’ Frar tressaq rapport lill-pulizija minn minorenni li allegat li bejn l-2019 u l-2024 kienet vittma ta’ abbuż sesswali mill-għalliem tagħha tal-lezzjonijiet privati.
L-Ispettur Ryan Vella spjega li t-tfajla qalet lill-pulizija tal-Vice Squad li l-allegat aggressur kien imissilha l-partijiet intimi, ineżżagħha u jmissilha sidirha. F’okkażjoni minnhom, allegatament biesha fuq xuftejha. Il-Qorti semgħet ukoll li l-minorenni tbati mill-ADHD u l-awtiżmu, fatt li, skont il-prosekuzzjoni, jagħmilha vittma vulnerabbli.
L-akkużat, Innocent Sciberras, qed jiffaċċja akkużi li wettaq atti sesswali mingħajr kunsens fuq minorenni taħt il-15-il sena, li kienet fdata lilu bħala għalliem tal-lezzjonijiet privati, kif ukoll akkużi ta’ fastidju sesswali.
L-avukat difensur Leslie Cuschieri talab lill-Qorti biex tipprojbixxi l-pubblikazzjoni tal-isem tal-akkużat, billi sostna li l-akkużat u l-familja tal-allegata vittma kienu ħbieb mill-qrib u li l-pubblikazzjoni setgħet twassal biex tiġi identifikata l-minorenni.
Il-prosekutur l-Avukat Darlene Grima oġġezzjonat għal din it-talba, u sostniet li l-pubblikazzjoni tal-isem ma twassalx għall-identifikazzjoni tal-vittma u li t-talba kienet qed issir biex tipproteġi lill-akkużat. Il-Qorti ċaħdet it-talba peress li ma sabitx bażi legali valida.
Id-difiża talbet ukoll għall-ħelsien mill-arrest, u sostniet li l-allegati reati seħħew snin ilu u li l-minorenni diġà tat il-verżjoni tagħha lill-pulizija. Madankollu, il-prosekuzzjoni oġġezzjonat, bl-Ispettur Dorianne Tabone tispjega li wara li t-tfajla tkellmet mal-pulizija, allegatament sabet lill-akkużat jistenniha ħdejn l-iskola biex jagħtiha rigal. Skont il-prosekuzzjoni, dan jindika tentattiv ta’ influwenza fuq xhud.
Wara li semgħet is-sottomissjonijiet, il-Qorti ċaħdet il-ħelsien mill-arrest minħabba n-natura serja tal-akkużi u l-fatt li l-vittma, li għadha minorenni, kif ukoll il-familjari tagħha, għadhom ma xehdux.
Il-każ qed jiġi presedut mill-Maġistrat Giannella Camilleri Busuttil. Il-prosekuzzjoni qed titmexxa mill-avukat mill-Uffiċjali tal-Avukat Ġenerali Darlene Grima, assistita mill-Ispetturi Ryan Vella u Dorianne Tabone, filwaqt li l-avukat Leslie Cuschieri qed jidher għall-akkużat.
