Raġel ta’ 56 sena mir-Rabat ammetta fil-Qorti li ta n-nar lill-karozza tiegħu stess u li ħaraqha ġewwa Fomm ir-Riħ, wara li filmati ta’ CCTV qabduh fil-mument tal-att li wassal għall-qerda totali tal-vettura. L-Ispettur tal-Pulizija Keith Rizzo spjega li l-pulizija ġew infurmati b’karozza taqbad f’Fomm ir-Riħ fit-12 ta’ Frar.
Meta waslu fuq il-post, il-vettura kienet meqruda, iżda l-pulizija rnexxielhom jirkupraw in-numru tal-pjanċi tar-reġistrazzjoni u bdew l-investigazzjonijiet. Mill-ewwel investigazzjonijiet, l-uffiċjali tkellmu ma’ Charles Cassar, li fuqu kienet irreġistrata l-karozza, bħala l-allegat vittma. Hu qal lill-pulizija li kien ipparkja l-vettura f’Fomm ir-Riħ ġurnata qabel u ma reġax użaha.
Madankollu, filmati tas-CCTV wrew lil Cassar jasal fil-post bil-karozza u jitlaq b’vettura differenti. Filmati oħra wrewh jirritorna lejn l-inħawi għall-ħabta tal-1am tat-12 ta’ Frar u jqabbad il-karozza tiegħu stess. Cassar ġie arrestat it-Tnejn filgħodu u waqt l-interrogazzjoni ammetta li wettaq ir-reat.
It-Tlieta waranofsinhar tressaq il-Qorti mixli li qabad il-vettura tiegħu, kiser il-paċi pubblika u tefa’ skart f’post pubbliku. Hu wieġeb ħati għall-akkużi miġjuba kontrih. Il-Qorti spjegatlu l-konsegwenzi tal-ammissjoni tiegħu qabel ma kkonferma l-intenzjoni li jammetti l-ħtija.
L-avukat tal-għajnuna legali, Sarah Ciliberti, talbet għall-ħelsien mill-arrest sakemm tingħata s-sentenza. Il-prosekuzzjoni ma oġġezzjonatx sakemm l-akkużat ikun obbligat jiffirma darba fil-ġimgħa. Il-Qorti laqgħet it-talba u tat il-ħelsien mill-arrest kontra garanzija personali ta’ €500, b’ordni li jiffirma l-Għassa tal-Pulizija darba fil-ġimgħa.
Il-każ ġie presedut mill-Maġistrat Giannella Camilleri Busuttil. Il-prosekuzzjoni tmexxiet mill-avukat mill-uffiċċju tal-Avukat Ġenerali Celine Fenech, assistita mill-Ispetturi Lydon Zammit, Keith Rizzo u Italo Mizzi.
