L-aħħar meeting tal-atletika fil-Marsa qabel il-Kampjonat Nazzjonali tax-Xitwa wasslet għal żewġ rekords nazzjonali ġodda u serje ta’ riżultati tajbin hekk kif aktar minn 130 atleta ħadu sehem fid-dixxiplini differenti bħala parti mit-tħejjija tagħhom għal dan l-appuntament ewlieni.
Il-prestazzjoni ewlenija kienet dik taż-żagħżugħ ta’ La Salle Matthew Galea Soler li kiseb rekord nazzjonali u U23 fis-600m, b’ħin ta’ 1:17.93. Għat-tieni darba f’daqstant parteċipazzjonijiet din is-sena, Jordan Pace wkoll kiseb rekord nazzjonali u dak tal-Under 23, meta stabbilixxa ħin ta’ 39.11 fit-300m hurdles.
L-isprints reġgħu kienu ċ-ċentru tal-attenzjoni ta’ dan il-meeting b’ħinijiet b’saħħithom f’din il-fażi tal-istaġun. Ewlenin fost dawn, ir-rebħa ta’ El Aida Chaffey ta’ Żurrieq fis-60m f’ħin notevli ta’ 6.85 sekonda, quddiem Graham Pellegrini ta’ Pembroke (7.12s) u Kurt Zahra ta’ Rush AC (7.19s). Pellegrini kellu wkoll rebħa tajba fit-300m f’34.59 sekonda.
Fis-60m nisa, Alessia Cristina (Pembroke) rebħet f’7.94s, quddiem Carey Spiteri u Leah Frendo, it-tnejn ta’ Rush AC, itemmu qrib, b’8.04s u 8.09s rispettivament. Iż-żewġ tfajliet ta’ Rush AC kienu wkoll protagonisti fit-300m, din id-darba tkun Frendo li ttemm l-ewwel post b’42.14s b’Spiteri warajha b’42.39s.
Fit-tfigħ, riżultat li ġibed l-attenzjoni ta’ dawk preżenti fil-Marsa kien dak ta’ Sophia Curmi, li fil-hammer throw tefgħet għall-ewwel darba lil hinn minn 50 metru (50.07m) fil-karriera żagħżugħa tagħha, 20 ċm biss ‘il bogħod mill-aqwa riżultat qatt reġistrat fil-kategorija tagħha.
Tripletta ta’ rekords nazzjonali għal Jared Micallef
F’Melbourne, Jared Micallef kiser rekord nazzjonali ieħor fl-avveniment Box Hill Burn meta rebaħ it-tellieqa tal-1000m f’2:23.61. Micallef huwa d-detentur tar-rekords nazzjonali tat-800m u l-1500m ukoll.
Intant, tliet atleti Maltin irrappreżentaw lil pajjiżna fil-Kampjonat tal-Atletika Indoor tal-Balkani f’Belgrad, fit-tellieqa tas-60m. Jorrin Busuttil kiseb ħin ta’ 7.23s, filwaqt li Azzopardi u Thea Parnis kellhom ħin ta’ 7.73s u 7.81s rispettivament.
