Il-kumpilazzjoni tal-provi kontra Mohammed El Mushraty, magħruf bħala “Lilu King”, kompliet l-Erbgħa b’xhieda ta’ uffiċjali tal-Pulizija dwar filmati marbuta ma’ allegata ħabta li seħħet f’Awwissu 2024 qrib il-Bay Street Shopping Complex.
Skont il-prosekuzzjoni, El Mushraty, Tuneżin ta’ 33 sena, allegatament baqa’ dieħel bil-karozza tiegħu f’buggy b’mod deliberat waqt li kien barra bil-libertà proviżorja. Il-Pulizija kienu rċevew rapporti dwar karozza fin-nofs tat-triq quddiem il-kumpless kummerċjali, fejn allegatament kien hemm raġel imweġġa’. Intqal li l-akkużat deher jitkellem mas-sewwieq ferut u ma’ mara, li ġiet deskritta bħala l-eks sieħba tiegħu.
L-Ispettur Eman Hayman kien l-ewwel li xehed. Huwa ppreżenta email li tispjega l-proċedura segwita meta jintalbu filmati tal-bodycam, flimkien ma’ tweġiba minn membru tal-istaff tekniku li pprovdielu link online għar-reġistrazzjonijiet.
Wara xehed l-uffiċjal Jean Paul Pizzuto, li qal li fit-12 ta’ Awwissu 2024 kien ingħata struzzjonijiet mill-Ispettur Hayman biex jiġbor filmati tas-CCTV minn bar f’San Ġiljan relatati mal-lejla tat-8 ta’ Awwissu. Huwa kkonferma li rkupra l-filmati u ppreżenta kopja fil-Qorti, u nnota li r-reġistrazzjoni kienet twila madwar żewġ minuti. Uffiċjal ieħor spjega l-proċeduri interni tal-Pulizija meta jintalbu estratti minn filmati tal-bodycam.
Filmati Murija fil-Qorti
Il-Qorti rat filmati tal-bodycam relatati mal-konfront f’Paceville. Fir-reġistrazzjoni, xhud iddeskriva lill-allegat aggressur bħala raġel twil ħafna b’komplessjoni skura, filwaqt li uża ġesti bl-idejn biex juri l-għoli tiegħu.
Is-sewwieq ferut instema’ jgħid li jemmen li r-raġel kien qed jipprova jaħrab, filwaqt li mara preżenti kkonfermat li kien seħħ inċident tat-traffiku u li dak il-ħin ma kien ġie nnutat l-ebda number plate. El Mushraty qed jiffaċċja wkoll proċeduri kriminali oħra fejn jinsab akkużat b’ħasil ta’ flus, evażjoni tat-taxxa, parteċipazzjoni f’organizzazzjoni kriminali u, minn Jannar 2023, traffikar tad-droga.
Fir-reġistrazzjoni murija fil-Qorti, xhud iddeskriva lill-allegat aggressur bħala raġel twil ħafna u b’komplessjoni skura, filwaqt li uża ġesti b’idejh biex jindika li huwa twil. Is-sewwieq ferut instema’ jgħid li kien jemmen li r-raġel kien qed jipprova jaħrab minn fuq il-post, filwaqt li mara li kienet preżenti kkonfermat li kien seħħ inċident tat-traffiku u li dak il-ħin ma kien ġie nnutat l-ebda number plate.
Meta Mohammed Ali Ahmed Elmushraty, ta’ 32 sena kien ġie arrestat dwar dan il-każ u tressaq il-Qorti, l-arrest tiegħu kien ġie meqjus bħala invalidu wara li rriżulta li l-Pulizija naqsu milli jinfurmaw lill-Maġistrat kif meħtieġ bil-liġi.
Dan wassal biex Elmushraty inħeles mill-arrest u ġie lliberat. Madankollu l-każ fil-konfront tiegħu kien tkompla. Hu kien ġie arrestat għall-ħabta tas-1.30am wara li allegatament kien involut f’argument f’Paceville li eskala meta ħabat ma’ vettura oħra. Huwa qed jiġi akkużat b’sewqan bi traskuraġni u b’mod perikoluż.
Minbarra dan, qed jiġi mixli li kien qed isuq mingħajr liċenzja tas-sewqan valida u mingħajr polza tal-assigurazzjoni, kif ukoll bi ksur tal-kundizzjonijiet tal-libertà proviżorja relatati ma’ każ preċedenti. Fil-fatt, Elmushraty bħalissa jinsab fuq libertà proviżorja fuq tliet każijiet separati.
Hu mifhum li l-argument beda wara li Elmushraty allegatament lemaħ lill-eks tfajla tiegħu fil-vettura li eventwalment ħabat fiha. Is-sewwieq tal-vettura ttieħed l-Mater Dei Hospital għall-kura, iżda telaq minn jeddu ftit wara li wasal.
Mohammed El Mushraty qed jiffaċċja wkoll proċeduri kriminali oħra pendenti, fejn jinsab akkużat b’ħasil ta’ flus, evażjoni tat-taxxa, parteċipazzjoni f’organizzazzjoni kriminali u, minn Jannar 2023, traffikar tad-droga.
Il-każ qed jinstema’ mill-Maġistrat Caroline Farrugia Frendo. F’dawn il-kawżi Lilu King għandu jiddefenduh lill-Avukati Franco Debono, Marion Camilleri u Josè Herrera. Il-kumpilazzjoni tal-provi fil-każ dwar il-ħabta allegata għandha tkompli f’seduti oħra.
