Żewġt irġiel baqgħu miżmuma taħt kustodja preventiva wara li tressqu l-Qorti akkużati b’pussess u traffikar ta’ droga f’San Pawl il-Baħar. Lamin Keita, ta’ 34 sena mill-Mali, u Ousman Manneh, ta’ 27 sena mill-Gambja, wieġbu mhux ħatja għall-akkużi miġjuba kontrihom.
Il-Pulizija qalet li l-arresti saru t-Tlieta, meta uffiċjali osservaw lir-raġel ta’ 27 sena fiż-żona ta’ Fra Ben, f’San Pawl il-Baħar, allegatament ibigħ sustanza suspettata li hija cannabis. Waqt tfittxija fuqu nstabet sustanza suspettata bħala droga, filwaqt li borża tal-plastik moħbija taħt xi friegħi fil-qrib kienet tinkludi diversi qratas bl-istess sustanza.
Fl-istess ħin, uffiċjali tal-Pulizija daħlu f’residenza fi Triq ix-Xolfa, ukoll f’San Pawl il-Baħar, fejn arrestaw lir-raġel ta’ 34 sena mill-Mali. Tfittxija fid-dar wasslet biex instabu diversi qratas oħra li fihom sustanza suspettata cannabis.
B’kollox, matul iż-żewġ operazzjonijiet instabu madwar 75 qartas ta’ droga, li qed jiġu analizzati bħala parti mill-proċeduri kriminali. It-tressiq sar quddiem il-Maġistrat Marsanne Farrugia, li ordnat iffriżar tal-assi tal-akkużati.
Il-prosekuzzjoni tmexxiet mill-Ispettur Gabria Gatt, assistita mill-avukat Julian Scicluna mill-Uffiċċju tal-Avukat Ġenerali. L-akkużati kienu assistiti mill-avukati tal-għajnuna legali Sarah Ciliberti u Axel Camilleri.
