Raġel ta’ 24 sena residenti l-Ħamrun ingħata sentejn ħabs u multa ta’ €1,500 wara li ammetta li kellu fil-pussess tiegħu diversi tipi ta’ droga f’ċirkostanzi li jindikaw li ma kinux għall-użu personali.
Abdul Bari Yousef, ta’ nazzjonalità Sudaniża u residenti l-Ħamrun, wieġeb ħati għall-akkużi li kellu fil-pussess tiegħu kannabinojdi sintetiċi mingħajr awtorizzazzjoni, kif ukoll raża tal-kannabis u partijiet mill-pjanta tal-kannabis f’ċirkostanzi li jindikaw li d-droga ma kinitx għall-użu esklussiv tiegħu.
Il-qorti semgħet kif il-pulizija kienu ilhom josservaw il-movimenti tal-akkużat qabel l-arrest tiegħu. Nhar it-Tlieta, uffiċjali tal-pulizija avviċinawh fil-Ħamrun wara li rawh jidħol u joħroġ minn ħanut fl-inħawi. Ftit wara huwa ġie arrestat u sare tfittxija fuqu.
Matul it-tfittxija, l-uffiċjali sabu ammont ta’ flus fil-ġakketta tiegħu u diversi pakketti żgħar ta’ droga moħbija kemm fil-ġakketta kif ukoll fil-jeans tiegħu. Tfittxija oħra li saret fir-residenza tiegħu wasslet biex instabu aktar flus kontanti u total ta’ 10 mowbajls.
B’kollox, il-pulizija kkonfiskaw madwar 190 gramma droga mill-pussess tal-akkużat. Dan kien jinkludi madwar 92 gramma kannabinojdi sintetiċi, 82 gramma raża tal-kannabis u madwar 9 grammi kannabis f’forma ta’ pjanta.
Il-prosekuzzjoni talbet piena ta’ sentejn ħabs. Il-qorti aċċettat il-pleġġ ta’ ħtija u kkundannat lil Yousef għal sentejn priġunerija flimkien ma’ multa ta’ €1,500.
L-avukat Yanika Barbara Sant dehret għall-akkużat, filwaqt li l-prosekuzzjoni tmexxiet mill-Ispettur Matthew Attard flimkien mal-avukat tal-Avukat Ġenerali Daniel Tabone. Is-seduta kienet preseduta mill-Maġistrat Monica Vella.
