Il-Membri tal-Parlament Ewropew David Casa (PPE) u Marit Maij (S&D) illum laqqgħu bosta għaqdiet Ewropej biex jiġbru kontribut dwar il-futur tal-Fond Soċjali Ewropew (FSE) hekk kif bdiet il-ħidma fil-Parlament Ewropew dwar il-Qafas Finanzjarju Pluriennali (QFP) li jmiss.
Il-laqgħa, li saret fil-Parlament Ewropew, ġabret flimkien organizzazzjonijiet mis-soċjetà ċivili, l-imsieħba soċjali u l-partijiet interessati involuti fl-implimentazzjoni tal-programmi tal-FSE madwar l-Unjoni Ewropea. Il-parteċipanti qasmu l-fehmiet tagħhom dwar il-proposta tal-Kummissjoni Ewropea għall-FSE li jmiss u enfasizzaw it-tagħlimiet meħuda mill-implimentazzjoni nazzjonali.
Casa u Maij reċentement inħatru konegozjaturi responsabbli għat-tmexxija tal-ħidma tal-Parlament Ewropew dwar il-proposta leġiżlattiva.
Fi stqarrija wara l-laqgħa, il-Kap tad-Delegazzjoni tal-PN David Casa saħaq li l-FSE futur għandu jibqa’ strument b’saħħtu u identifikabbli b’mod ċar iddedikat għall-investiment fin-nies.
“Il-Fond Soċjali Ewropew għen lil miljuni ta’ Ewropej jaċċessaw it-taħriġ, l-impjiegi u l-appoġġ soċjali. Bħala korapporteurs, irridu niżguraw li l-FSE li jmiss jibqa’ strument b’saħħtu u effettiv li jwassal opportunitajiet reali għall-ħaddiema, għal dawk li qed ifittxu impjieg u għall-komunitajiet vulnerabbli madwar l-Ewropa. Huwa essenzjali li l-FSE jibqa’ fond awtonomu b’missjoni soċjali ċara, mhux imdgħajjef fi ħdan pjanijiet ta’ investiment nazzjonali usa,’” qal David Casa.
Marit Maij enfasizzat l-importanza li tinżamm dimensjoni soċjali b’saħħitha fil-baġit fit-tul tal-UE.
“Il-Fond Soċjali Ewropew huwa l-aktar għodda importanti tal-UE fil-ġlieda kontra l-faqar, fil-promozzjoni ta’ impjiegi ta’ kwalità u fl-investiment fin-nies. Biex jibqa’ effettiv, irid iżomm l-identità u l-iskopijiet ċari tiegħu. L-integrazzjoni tal-finanzjament soċjali fi pjanijiet nazzjonali usa’ tirriskja li ddgħajjef il-viżibbiltà u l-impatt tal-programmi li jappoġġaw direttament lin-nies u lill-komunitajiet madwar l-Ewropa,” qalet Marit Maij.
Il-kontribut miġbur matul il-laqgħa se jikkontribwixxi għall-ħidma tal-Parlament Ewropew hekk kif iħejji l-pożizzjoni tiegħu dwar il-futur tal-Fond Soċjali Ewropew fi ħdan il-baġit fit-tul li jmiss tal-UE.
