Il-Qorti ċaħdet it-talba għall-ħelsien mill-arrest ta’ Keith Pace ta’ 45 sena minn Santa Venera, is-sieħba tiegħu Maria Grixti ta’ 49 sena mill-Marsa u ż-żewġ aħwa Carlos Pace u Cleaven Pace ta’ 24 sena u 20 sena rispettivament. Dawn l-erba’ akkużati qed jiffaċċjaw proċeduri kriminali b’rabta ma’ użura u ħasil ta’ flus.
It-talba tagħhom għal bail ġiet miċħuda għat-tielet darba.
Dan kollu ġie kkonfermat wara li waqt kumpilazzjoni tax-xhieda li saret it-Tlieta fil-Qorti, ġie żvelat kif Keith Pace għandu madwar għaxar proprjetajiet mixtrija jew mikrija f’ismu u f-isem missieru.
Hu diġa trssaq quddiem il-Qorti madwar 40 darba b’rabta ma’ numru ta’ reati.
Min-naħa tagħha, l-Qorti qalet li t-talba għall-ħelsien mill-arrest qed tiġi miċħuda minħabba n-natura tar-reati u l-biża’ ta’ tbagħbis fil-provi.
Fil-Qorti ħareġ ukoll li missier Kieth….Lawrence Pace, ħadem biss sitt snin f’ħajtu kollha, waqt li fuq ismu għandu rreġistrati numru ta’ vetturi, inkluża Jaguar.
Ommu, Emanuela, avolja m’għandhiex liċenzja tas-sewqan, għandha 16-il karozza wkoll fuqha, fosthom Corvette. Iż-żewġ anzjani qed jiffaċċjaw ukoll akkużi serji ta’ ħasil ta’ flus….wara raid li kien sar fil-Marsa x-xahar li għadda.
Għall-aħwa u l-missier qed jidhru l-avukati Franco Debono, Marion Camilleri u Adreana Zammit filwaqt li għall-anzjani dehru l-avukati Arthur Azzopardi u Jacob Magri.
Il-prosekuzzjoni tinsab f’idejn l-Ispettur Lianne Bonello flimkien mal-Avukati Neville Galea u Michael Muscat f’isem l-Avukat Ġenerali.
