Il-Malta Supporters Cup intemm b’suċċess bil-Liverpool Supporters Club joħorġu rebbieħa tat-turnament wara ġurnata mimlija futbol u divertiment.
It-turnament laqqa’ flimkien supporters’ clubs differenti f’Malta f’kompetizzjoni organizzata f’format ta’ league, li matulha t-timijiet parteċipanti lagħbu kontra xulxin. Wara sensiela ta’ logħbiet kompetittivi fil-fażi tal-league, Liverpool u Arsenal għaddew għall-finali, b’Liverpool joħorġu rebbieħa u jerfgħu t-trofew.
L-attività ma kinitx biss waħda sportiva, iżda ġurnata sħiħa ddedikata għaċ-ċelebrazzjoni tal-kultura tal-futbol u tal-għaqda bejn il-partitarji. Matul il-ġurnata, dawk preżenti setgħu jgawdu wkoll ikel, mużika u diversi attivitajiet organizzati mill-għaqdiet parteċipanti, li komplew isaħħu l-atmosfera familjari.
Il-finali bejn Liverpool u Arsenal kienet il-qofol tal-ġurnata, u għalqet turnament li wera mhux biss il-livell ta’ kompetizzjoni bejn it-timijiet, iżda wkoll kif il-futbol jista’ jservi ta’ pont bejn komunitajiet differenti.
