Skont rapporti fil-media Spanjola, Erling Haaland talab lil Manchester City biex jikkunsidraw offerti minn Barcelona u klabbs ewlenin oħra fis-sajf li ġej. L-attakkant Norveġiż, li ngħaqad ma’ The Citizens fl-2022 mingħand Borussia Dortmund, sar membru importanti fl-iskwadra ta’ Pep Guardiola, b’154 gowl f’188 partita, inklużi 30 dan l-istaġun.
Madankollu, Haaland jinsab f’fażi diffiċli, b’ħames gowls biss fl-aħħar 19-il logħba, u jidher li qed jikkunsidra serjament li jitlaq wara t-telfa ta’ Manchester City kontra Real Madrid fil-UEFA Champions League. Barra minn hekk, il-klabb jinsab disa’ punti wara Arsenal fil-Premier League Ingliż, minkejja li lagħbu confront aktar.
Ir-rapporti jindikaw li Haaland hu diżappuntat bil-proġett sportiv tas-City u li Guardiola jista’ jirriżenja fis-sajf. Il-plejer ta’ 25 sena jidher li biddel fehmtu dwar li jibqa’ sena oħra fl-Etihad Stadium u talab lill-bord biex jikkunsidra kull proposta li tasal, b’Barcelona, Real Madrid, Paris Saint-Germain u Bayern Munich kollha interessati fl-akkwist tiegħu. Jingħad ukoll li Manchester City jistgħu jikkunsidraw li jbigħu lin-Norveġiz biex jiffirmaw attakkant ġdid.
Madankollu, l-aġenta tiegħu Rafaela Pimenta ċaħdet li hemm kuntatt ma’ Barcelona, u qalet li Haaland hu kuntent ħafna ma’ Manchester City u li kollox miexi tajjeb wara li ffirma kuntratt ġdid ftit tax-xhur ilu.
Fuq il-prestazzjoni tiegħu kontra Real Madrid, l-eks attakkant ta’ Tottenham Jurgen Klinsmann iddeskriva l-logħba ta’ Haaland bħala “imbarazzanti”, u żied jgħid li sħabu fit-tim ma għenuħ xejn u tilef kull dwell individwali. Skont Klinsmann, meta attakkant bħal Haaland ma jkunx mgħejjun kif suppost minn sħabu, jitilfu l-kunfidenza u l-motivazzjoni.
Dwar il-futur ta’ Guardiola, il-ġurnalist Fabrizio Romano żvela li l-klabb għadu qed jistenna d-deċiżjoni tiegħu, u li s-sitwazzjoni għadha miftuħa. Għalissa, il-futur ta’ Haaland u ta’ Guardiola tidher waħda inċerta, b’aktar żviluppi mistennija fis-sajf
