Il-kompetituri Maltin temmew ir-raba’ jum u t-tielet stadju tal-Absa Cape Epic, u issa waslu nofs triq f’dik li hija meqjusa bħala waħda mill-aktar kompetizzjonijiet tal-mountain bike diffiċli fid-dinja.
Dan l-istadju — l-itwal tal-Cape Epic — ra lill-parteċipanti jitilqu minn Montagu lejn Greyton fuq rotta ta’ 140km li kienet tinkludi 1,750 metru t’elevazzjoni. Kundizzjonijiet imsaħħbin u bir-riħ offrew xi ftit serħan mis-sħana tal-ġranet preċedenti, għalkemm il-korsa baqgħet waħda ferm impenjattiva.
Epic Team Deloitte (Mark Bonnici / Luke Borg), wara stadju diffiċli fejn ma kinux fl-aqwa tagħhom, urew reżiljenza u temmew il-korsa f’ħin ta’ 6:04:27.3. Minkejja li għadhom ma rkuprawx kompletament, huma rnexxielhom jimmaniġġjaw l-isforz tagħhom b’għaqal. L-istadju kien adatt għalihom, b’sezzjonijiet ta’ toroq ċatti u biż-żrar u singletrack li ppermettewlhom jieħdu vantaġġ mill-ħiliet tat-time trial tagħhom u jżommu ritmu medju b’saħħtu — u b’hekk kisbu riżultat aħjar milli mistenni.
Team Gaudos (Stephen Grima / Brandon Sultana) segwew mill-qrib, u temmew f’6:09:05.9.
Team Kalamba Racing temmew il-korsa f’6:40:45.3, b’Etienne Bonello jiddeskrivi l-istadju bħala “wieħed mimli tajn u b’toroq li donnhom ma jispiċċaw qatt — speċjalment lejn l-aħħar.” Wara l-isforzi intensivi tal-aħħar jiem, l-għeja bdiet tinħass, u dan jagħmel il-ġestjoni tal-pass aktar kruċjali b’erba’ stadji oħra diffiċli li għadhom ġejjin.
Fil-klassifika ġenerali, Epic Team Deloitte raw tibdil żgħir fil-pożizzjonijiet wara dan l-istadju diffiċli, iżda rkupraw tajjeb u kisbu lura xi pożizzjonijiet. Sadanittant, Team Gaudos qed ikomplu jitilgħu b’mod konsistenti fil-klassifika ta’ grupp li fih kompetizzjoni qawwija min 173 tim.
Fil-kategorija Mixed, Team Kalamba Racing qed iżommu momentum pożittiv u bħalissa jinsabu fit-22 post minn 61 tim parteċipanti.
Issa l-attenzjoni ddur fuq l-istadju li jmiss f’Greyton, fejn il-parteċipant se jiffaċċjaw rotta iqsar ta’ 87km. Minkejja d-distanza iqsar, l-istadju xorta se jinkludi diversi telgħat impenjattivi, li jfissru li l-isfida tibqa’ waħda sostanzjali.
