Colin Schembri
Hibernians……..58
Luxol………………45
(15-7)(17-14)(12-13)(14-11)
Hibernians fetħu s-serje tal-finali tal-kampjonat tat-tfajliet ta’ taħt is-sittax -il sena b’rebħa ta’ 58-45 fuq Luxol, f’partita fejn ħadu kontroll kmieni u żammewh għal kważi l-ħin kollu. Id-differenza prinċipali dehret fil-preżenza tagħhom fiż-żona b’42 punt kontra 32, kif ukoll fid-dominanza fir-rebounds b’71 kontra 47. Hibernians kienu wkoll aktar effettivi fit-tieni opportunitajiet u żammew il-vantaġġ għal kważi l-logħba kollha, fattur li wera l-kontroll tagħhom tul il-konfront.
Victoria Dabic kienet fost l-aktar konsistenti għal Hibernians b’9 punti u 14-il rebound, filwaqt li Lara Micallef u Martina Mendez ikkontribwew punti importanti f’mumenti kruċjali. Għal Luxol, Eve Axisa kienet l-aqwa skorer bi 13-il punt, filwaqt li Katrina Marmara u Ella Cachia kellhom mumenti tajbin speċjalment meta t-tim ipprova jersaq viċin.
Hibernians bdew b’saħħithom u fetħu vantaġġ kmieni permezz ta’ Lara Micallef u Victoria Dabic, filwaqt li Alexa Sammut żiedet punti importanti minn fast breaks biex it-tim tagħha fetaħ distakk ta’ 15-5. Luxol wieġbu biss lejn l-aħħar tal-ewwel sessjoni permezz ta’ Marmara biex naqsu d-distakk għal 15-7. Fit-tieni taqsima Luxol ippruvaw jerġgħu jidħlu fil-logħba, b’trippla ta’ Marmara u punti minn Axisa li naqqsu d-distakk. Madankollu Hibernians komplew jikkontrollaw, b’run oħra mmexxija minn Micallef u Dabic li reġgħu fetħu vantaġġ komdu u daħlu fil-mistrieħ 32-21 minn fuq.
Fit-tielet sessjoni Hibernians komplew iżidu l-vantaġġ tagħhom sa 15-il punt, iżda Luxol wieġbu b’run tajba mmexxija minn Axisa u Adria Xuereb biex naqqsu d-distakk għal 10 punti. Minkejja dan, punti tard minn Kirstie Sammut żammew lil Hibernians quddiem 44-34. Fl-aħħar sessjoni Luxol għamlu l-aħħar sforz tagħhom u waslu sa tmien punti wara trippla ta’ Axisa u baskets konsekuttivi minn Cachia u Schembri. Madankollu Hibernians wieġbu b’mod kalm permezz ta’ Martina Mendez u Sammut li reġgħu kabbru d-distakk u assiguraw rebħa importanti ta’ 58-45 biex marru minn fuq fis-serje.
Hibernians: Lara Micallef 15, Elly Jovanovic 7, Kirstie Sammut 8, Dezaiya Abela, Zaira Ahar, Martina Muscat, Martina Mendez 12, Sera Cassar 1, Alexa Sammut 6, Viktorija Dabic 9, Zanesh Agius.
Luxol: Eve Axisa 13, Emma Mallia 2, Sara Cosic, Katrina Marmara 11, Adria Xuereb 6, Valentina Portelli, Elena Saliba, Giulia Schembri 5, Elysa Joy Delic, Gemma Ivanova, Ella Cachia 8, Ella El Trabelsi.
Referees: Miguel Pablo De Flavia, Jacques Seifert, Nicky Azzopardi
