Il-FIFA ħabbret li kkanċellat madwar 2,000 kamra ta’ lukanda li kienu riservati fil-jiem li se tkun qed tintlagħab it-Tazza tad-Dinja ta’ din is-sena f’Philadelphia, iżda ma tat l-ebda spjegazzjoni għad-deċiżjoni tagħha. Skont il-Greater Philadelphia Hotel Association, il-FIFA kienet inizjalment irriservat madwar 10,000 kamra f’din il-belt l-aktar populata li fl-istat Amerikan ta’ Pennsylvania.
Il-President tal-assoċjazzjoni, Ed Grose, qal lil sit tal-aħbarijiet ta’ Philadelphia, li l-maġġoranza tal-kanċellazzjonijiet seħħew f’erba’ lukandi fiċ-ċentru tal-belt. Huwa żied jgħid li l-FIFA aġixxiet skont it-termini tal-kuntratt tagħha u għalhekk ma ġietx penalizzata. Minkejja dan, il-kanċellazzjonijiet ħolqu inċertezza fost is-settur turistiku lokali, li kien qed jistenna domanda qawwija matul il-kompetizzjoni globali.
