Raġel ta’ 37 sena minn Ħal Tarxien inżamm arrestat wara li allegatament hedded lil ħuh min-naħa ta’ ommu b’mannara waqt konversazzjoni ma’ oħthom, b’tensjonijiet li żdiedu minħabba sitwazzjoni diffiċli ta’ għajxien flimkien.
L-Erbgħa, r-raġel tressaq quddiem il-Maġistrat Marse-Anne Farrugia, akkużat li hedded lil ħuh, uża komunikazzjoni elettronika biex ibeżża’, u allegatament wera arma li taqta’ waqt konfront fid-dar t’ommhom li mietet sena ilu.
Il-prosekuzzjoni, immexxija mill-Ispettur Christian Cauchi, tat dettalji ta’ inċident li seħħ il-ġimgħa li għaddiet fejn l-akkużat allegatament hedded lil ħuh.Is-sitwazzjoni allegatament eskalat meta oħthom marret id-dar biex tiġbor l-affarijiet tal-vittma; l-akkużat allegatament ħareġ b’mannara, u qal li ħaseb li kien ġej ħuh.
L-avukat tiegħu sostna li t-tilwima bdiet meta t-tfajla tal-vittma, li ilha miegħu 5 xhur, marret tgħix fid-dar u “għamlitha burdell”.Id-difiża sostniet li l-użu frekwenti tal-magna tal-ħasil minn din it-tfajla għall-ħwejjeġ tal-familja tagħha wassal għal kont tad-dawl ta’ €1,500, li kellu jitħallas mill-vittma.
Il-prosekuzzjoni ċaħdet bil-qawwa it-talba għall-ħelsien mill-arrest, u semmiet ir-riskju ta’ intralċ tal-provi u l-fatt li r-raġel bħalissa jinsab taħt sentenza sospiża mogħtija f’Ottubru tal-2024.
Fl-aħħar mill-aħħar, il-qorti ċaħdet it-talba għall-ħelsien mill-arrest.Inħarġet ukoll ordni ta’ protezzjoni favur il-vittma u l-familja tiegħu.
