Tliet żgħażagħ tressqu l-Qorti akkużati b’attakk b’sikkina fuq tfajla ta’ 16-il sena f’Birkirkara fl-1 ta’ Marzu. L-imputati huma Aaliyah Borg ta’ 18-il sena, Kenley Borg ta’ 20 sena u Liam Agius ta’ 25 sena. Fil-bidu tal-proċeduri, it-tlieta wieġbu mhux ħatja tal-akkużi miġjuba kontrihom.
Skont il-prosekuzzjoni, l-allegat każ seħħ fi Triq Kalċidon, kantuniera ma’ Triq Paris. Aaliyah Borg tinsab akkużata li kkawżat ġrieħi gravi fuq il-vittma permezz ta’ arma li taqta’ u bil-ponta, kif ukoll li heddet lill-istess tfajla u ġarret arma mingħajr il-permess meħtieġ. Huwa msemmi li Borg għandha wkoll tarbija ta’ tmien xhur.
Kenley Borg u Liam Agius jinsabu akkużati li ħadu sehem bħala kompliċi fl-allegat attakk, li rriżulta f’ferita gravi fuq il-minorenni. Mill-akkużi jirriżulta wkoll li Kenley Borg saq vettura mingħajr liċenzja tas-sewqan, filwaqt li Liam Agius wettaq ir-reat waqt li kien fuq perjodu ta’ sentenza sospiża mogħtija kontrih f’Settembru tal-2025.
Skont rapporti, waħda mill-imputati marret l-Għassa tal-Pulizija ta’ Birkirkara biex tirraporta li kienet involuta fi ġlieda, iżda ma riedetx tagħmel rapport formali u sempliċiment riedet li l-vittma ma tersaqx lejha.
Fil-Qorti dehru diversi avukati f’isem id-difiża, inkluż Franco Debono, Charles Mercieca, Axl Camilleri, Jose Herrera u Matthew Xuereb.
Matul is-seduta, id-difiża talbet għall-ħelsien mill-arrest għat-tliet imputati, iżda l-prosekuzzjoni opponiet it-talba. Wara li semgħet l-argumenti taż-żewġ naħat, il-Qorti ċaħdet it-talba u ordnat li l-imputati jinżammu taħt arrest.
Fis-seduta kienet hemm ukoll mument ta’ tensjoni meta omm waħda mill-imputati sofriet attakk ta’ paniku fil-Qorti, li rriżulta f’ambulanza u waqfiet temporanjament il-proċeduri.
L-imputati komplew jinżammu taħt arrest hekk kif ordnat il-Qorti.
