17:09 – Kollox hu lest biex f’inqas minn siegħa oħra tibda l-partita, mit-tieni leg tal-Promotion Play-Off tal-UEFA Nations League bejn Lussemburgu u Malta, f’Stade de Luxembourg. Wara r-rebħa ta’ 2-0 mil-Lussemburugu, f’Ta’Qali, nhar il-Ħamis li għadda, illum se tkun partita diffiċli iżda mhux impossibli għal Malta.
17:28 – Magħrufa l-ewwel ħdax għall-partita tal-lejla kontra l-Lussemburgu hekk kif magħżula minn Emilio De Leo. Bejn il-lasti, Henry Bonello, fid-difiża komposta minn erba’ difensuri, mal-ġnub iżommu posthom, Zach Muscat u Ryan Camenzuli, filwaqt ċentrali fid-difiża se jkun qed jibda mal-ewwel ħdax Gabriel Mentz li se jkun qed jieħu post Kurt Shaw. Iżomm postu fil-qalba tad-difiża, Enrico Pepe ta’ Marsaxlokk.
F’nofs il-grawnd, l-istess żewġ plejers li bdew fil-partita f’Ta’Qali, ċioè captain Matthew Guillaumier u Alex Satariano. It-tliet plejers f’rwol ta’ midfielders avvanzati se jkunu Paul Mbong, li se jkun qed jimla’ il-post vakanti ta’ Teddy Teuma, fuq il-lemin jirritorna wara li skonta sospensjoni, Joseph Mbong filwaqt li fuq ix-xellug iżomm postu l-fantażista fl-iskwadra Maltija u ta’ FC Sion, Ilyas Chouaref. L-attakkant ewlieni b’sistema ta’ 4-2-3-1, se jerġa’ jkun Irvin Cardona.
17:31 – Il-formazzjoni tal-avversarji hi din, b’sistema ta’ 4-1-2-2-1: Anthony Moris, Seid Korac, Florian Bohnert, Christopher Martins, Aiman Dardari, Danel Sinani, Dirk Carlson, Vincent Thill, Leandro Barreiro, Laurent Jans, Mathias Olesen.
Il-plejers tat-tim nazzjonali Malti bl-aħħar warming up qabel il-bidu tal-partita fis-6pm.
Il-Lussemburgu jitħarġu minuti biss qabel il-partita.
17:47 – Il-Kap tal-Partit Nazzjonalista, Alex Borg flimkien mal-Kelliem għall-Isport f’isem il-PN u l-Oppożizzjoni, fost dawk preżenti għal din il-partita.
Preżenti ukoll għal din il-partita f’Stade de Luxembourg hawn ukoll il-Prim Ministru ta’ Malta, Robert Abela.
Il-Kap tal-Partit Nazzjonalista, Alex Borg jistenna l-ħruġ tat-tim Malti.
Il-partitarji numerużi tal-Lussemburgu.
Iż-żewġ timijiet waqt l-inijiet nazzjonali rispettivi qabel il-bidu tal-logħba.
Bidu tal-konfront. Malta bl-ewwel azzjoni perikoluża wara tmien minuti logħob.
Tibda l-partita, u wara biss tmien minuti logħob Malta ħolqu l-ewwel periklu meta minn kross ta’ Joseph Mbong, akorbazija ta’ Ilyas Chouaref, il-goalkeeper avversarju kellu jsalva minn mal-art tentattiv tan-numru 20 ta’ Malta.
Jgħaddu l-ewwel għaxar minuti logħob u l-Maltin ħarġu jamministraw il-partita b’mod tajjeb. Jidher ċar li l-Maltin qed ifittxu ħafna lil Irvin Cardona u lil Ilyas Chouaref kull darba li nkunu fuq l-offensiva.
S’issa, rajna tim nazzjonali Malti organizzat u determinat li ma jħallix lill-avversarji jkollhom logħba faċli f’stadium mimli b’appoġġ għal-Lussemburgu.
18-il minuta logħob. Jerġgħu jkunu Malta fuq l-attakk. Ryan Camenzuli jivvertikaliżża l-logħob mix-xellug għal-lemin, fejn kien hemm Joseph Mbong, b’dan tal-aħħar wara li kkontrolla tajjeb minn barra ‘l kaxxa kkonkluda ftit għoli. ż
Il-Lussemburgu jiskorjaw mal-ewwel tentattiv lejn il-lasta avversarja
20 minuta logħob. Inkredibbli. L-avversarji ma kienu għadhom għamlu xejn sa dan il-ħin u rrnexxilhoim isibu l-gowl tal-vantaġġ għal 1-0. Kienet azzjoni veloċi li rat lil Lussemburgu jidħlu fil-kaxxa, xi ħaġa li kienet qed tkun rari, anke fl-ewwel partita, ballun għand Vincent Thill li minn quddiem Henry Bonello skorja l-gowl tal-vantaġġ momentarju. Tassew każ li jekk int Malti u qed issegwi l-partita tara dan il-gowl, tħossok frustrat għaliex mal-ewwel azzjoni tal-avversarji, dawn skorjaw.
24 minuta logħob u l-avversarji bħal donnu żiedu fil-kunfidenza. Konkluzzjoni ta’ Christopher Martins għaddiet ftit għolja mil-lasti ta’ Bonello.
27 minuta logħob u l-attakkant tal-Lussemburgu, Danel Sinani jkun muri l-karta s-safra għal fawl fuq Ilyas Chouaref. Minuta wara kien Joseph Mbong li kien muri l-ewwel safra minn fost il-plejers Maltin għal fawl fuq plejer avversarju.
Qbiżna l-ewwel nofs siegħa logħob u qed naraw l-istorja li kelna f’Ta’Qali tirrepeti ruħha. Malta b’aktar okkazzjonijiet ta’ skor iżda huma l-Lussemburgu li qed igawdu l-vantaġġ. Kif jista’ jkun? X’qed nagħmlu ħażin?
Malta b’sitt xuttijiet lejn il-lasta u li tnejn minnhom kienu fil-lasta, filwaqt li l-avversarji, żewġ tentattivi lejn il-lasta, li wieħed minnhom biss kien fil-lasta u kien dak li s’issa qed jiddeċidi l-partita għal skor ta’ 1-0. Tassew frustranti.
Eżatt qabel ma kien se jsaffar tmiem l-ewwel taqsima, penalty mogħti lil-Lussemburgu għal fawl ta’ Joseph Mbong fil-kaxxa.
Mill-11-il metru mar biex jagħti l-penalty Daniel Sinani u Henry Bonello kien deċiżiv u salva bi bravura.
Tmiem l-ewwel taqsima. Hu mistenni li mal-bidu tat-tieni taqsima se naraw xi bidliet fit-tim ta’ De Leo.
Mal-bidu tat-tieni 45 minuta, De Leo wettaq l-ewwel bidla. Juan Corbolan jidhol jilgħab flok Ryan Camenzuli.
Fit-48 minuta, Malta b’tentattiv minn free-kick mogħti minn Alex Satariano u Anthony Moris dawwar f’corner.
Malta dehret li ħarġet aggressiva iżda malajr soffrejna t-tieni gowl li f’dan l-istadju jista’ jitqis bħala l-kundanna ta’ Malta. Kien Leandro Barreiro li għadda l-ballun fil-kaxxa lil Sinani li patta għall-penalty li kien għadu kemm falla qabel tmiem l-ewwel taqsima u skorja l-gowl tat-2-0.
X’tista tgħid quddiem is-sitwazzjoni? Frustranti iżda ma jixirqilnix aħjar meta llum u nhar il-Ħamis ma approfittajna qatt mill-okkazzjonijiet ta’ skor li ġew fuq in-naħa tagħna. Sfortuna? Parti minha iva. Imma dawk id-dettalji li tkellem dwarhom il-kowċ De Leo hemm kienu qabel din il-logħba u hemm baqgħu. Dan ifisser li nbaxxu rasna għall-avversarji u naċċettaw li ma konnix kapaċi nagħmlu dak li għamlu huma.
Fit-62 minuta, Malta twettaq żewġ bidliet f’daqqa. Jidħol jilgħab id-difensur Jean Borg minflok Enrico Pepe u l-plejer ta’ Valletta misluf lil Torino, Keyon Ewurum minflok Paul Mbong.
Tliet minuti wara, Malta tispiċċa tilgħab b’għaxra meta Joseph Mbong kien muri t-tieni karta safra. Ta bilħaqq li ma nafx x’jonqos jiġi aktar kontra tagħna f’din il-partita. F’dan l-istadju narha impossibli li b’xi mod nistgħu nsalvaw xi ħaġa minn din il-lejla negattiva f’Lussemburgu.
70 minuta logħob, u l-Lussemburgu komplew ikabbru l-vantaġġ fuq il-Maltin. Kienet konkluizzjoni tas-sostitut Tomas Moreira li mill-viċin għelbet lil Bonello għat-tielet gowl tal-avversarji f’din il-lejla kiesħa u diżastruża għal Malta. Kif jista’ jkun? Wara din il-partita ta bilħaqq kulħadd għandu jagħmel eżami tal-kuxjenza. X’imkien qed infallu sew.
Fit-73 minuta, Malta twettaq bidla oħra. Jidħol jilgħab Myles Beerman minflok Zach Muscat.
