Jesmond Mizzi Financial Advisors investiet f’bini ikbar u ġdid fis-Central Business Hub fi Triq l-Imdina, Ħ’Attard, biex b’hekk ġabret taħt saqaf wieħed il-ħidma tal-kumpanija li kienet isservi direttament lill-klijenti u s-servizzi ta’ appoġġ amminstrattiv fil-Belt Valletta, il-Ħamrun u Birkirkara.
L-investiment jifforma parti mill-iżvilupp kontinwu tal-kumpanija u l-impenn tagħha li ttejjeb kontinwament l-offerta tagħha lill-klijenti. Filwaqt li preċedentement kienet topera minn diversi postijiet, it-timijiet ta’ konsulenza, investiment u appoġġ issa huma miġbura flimkien fi spazju tax-xogħol wieħed li ġie ddisinjat apposta, u b’hekk issaħħu l-koordinazzjoni u l-approċċ kollaborattiv li fuqu huma bbażati s-servizzi ta’ konsulenza lill-klijenti tagħha.
L-uffiċċji l-ġodda joffru ambjent modern u spazjuż, b’kmamar tal-laqgħat iddedikati għall-klijenti, aċċessibilità mtejba, u faċilitajiet ta’ parkeġġ fuq il-post. Il-bini ġie ddisinjat speċifikament biex jappoġġja kemm interazzjonijiet ta’ kwalità għolja mal-klijenti kif ukoll ambjent tax-xogħol effiċjenti għall-impjegati.
F’kumment dwar dan l-investiment, id-Direttur Maniġerjali Jesmond Mizzi stqarr: “In-negozju tagħna dejjem kien mibni madwar relazzjonijiet mill-qrib mal-klijenti tagħna u fehim ċar tal-objettivi finanzjarji tagħhom. Dan l-investiment jirrappreżenta pass naturali fl-iżvilupp tagħna, li jippermettilna nsaħħu aktar l-infrastruttura tagħna u ntejbu l-esperjenza ġenerali tal-klijent. Il-bini l-ġdid jipprovdi ambjent aktar modern u aċċessibbli fejn nistgħu nkomplu nappoġġjaw lill-klijenti tagħna b’ċarezza u kunfidenza.”
Imwaqqfa fl-2002, Jesmond Mizzi Financial Advisors bniet reputazzjoni soda fil-qasam tal-konsulenza dwar l-investiment u l-wealth management għal klijenti privati, korporattivi u istituzzjonali. Matul is-snin, il-kumpanija espandiet il-firxa tas-servizzi tagħha filwaqt li żammet enfasi qawwija fuq il-konsulenza personalizzata u strateġiji ta’ investiment fit-tul.
Issa l-klijenti ser ikunu qed jintlaqgħu fl-uffiċċji l-ġodda f’16, Level 2, Central Business Hub, Triq l-Imdina, Ħ’Attard ATD 9036. Il-kumpanija tkompli topera wkoll mill-uffiċċji tagħha f’Ta’ Xbiex. Id-dettalji ta’ kuntatt u l-kanali ta’ komunikazzjoni l-oħra kollha jibqgħu l-istess.
Jesmond Mizzi Financial Advisors (IS30176) hija liċenzjata biex twettaq negozju ta’ servizzi ta’ investiment mill-MFSA taħt l-Att dwar is-Servizzi ta’ Investiment u hija membru tal-Borża ta’ Malta.
