Kampjonat BOV Irġiel: Starlites Revive u Hibernians fil-finali għar-rebħ tal-kampjonat

Colin Schembri

The Plaza Depiro 73

Hibernians 95

(20-20)(18-27)(10-23)(25-25)

Hibernians kisbu d-dritt li jiddefendu t-titlu ta’ champions wara li saru l-ewwel finalisti tal-kampjonat Bank of Valletta b’rebħa konvinċenti ta’ 95-73 fuq Depiro, f’partita li ħadu taħt kontroll b’mod deċiżiv fit-tieni nofs. Wara bidu bilanċjat, Hibs għollew il-livell u bnew run qawwi fit-tielet sessjoni li fetaħ vantaġġ sostanzjali, li eventwalment laħaq sa 27 punt. Id-differenza kienet evidenti fil-fond tat-tim b’32 punt mill-bank u fit-tieni opportunitajiet fejn kisbu 20 punt, kif ukoll fiż-żona b’44 punt b’persentaġġ għoli. L-effiċjenza tagħhom fl-attakk kienet ukoll kruċjali b’1.23 punti kull pussess, filwaqt li żammew il-vantaġġ għal aktar minn 34 minuta. Depiro baqgħu fil-logħba fl-ewwel taqsima, iżda ma rnexxielhomx iżommu l-istess intensità wara l-mistrieħ kontra tim ta’ Hibernians li deher aktar komplet u konsistenti.  Kienu Hibs li għamlu l-ewwel punti minn Piotr Stelmach u Ayo Ajiboye bi Trevon Reddish u Cameron Cornelius jirrispondu għal Depiro. Wara break qasir ta’ 6-0 minn Hibs, Depiro kellhom ir-risposta minn Sean Galea u Cornelius biex fis-seba’ minuta kien hemm parita ta’ 12-12. Wara li Matthew Gouder poġġa lil Hibs fuq quddiem bi trippla, Depiro għamlu break qasir ta’ 6-0 però Hibs ippareġjaw bil-punti ta’ Matthew Attard għal skor ta’ 20-20. Hibs fetħu qawwi fit-tieni perjodu bi break ta’ 12-3 bi trippla ta’ Deonte Jackson u punti minn Gouder, Ajiboye u Ivan Demcesen. Il-punti ta’ Depiro gew bi trippla ta’ Luca Stefanovic u 5 punti konsekuttivi ta’ Cornelius. Hibs kellhom trippla minn Luke Farrugia qabel ma Depiro ġew lura b’run ta’ 7-00 inluż trippla oħra ta’ Stefanovic għal skor ta’ 34-37. Trippla ta’ Stelmach u punti ta’ Neil Cassar u free-throws ta’ Ajiboye u Jackson raw lil Hibs jidħlu jistrieħu 47-38 minn fuq.

Wara l-intervall, Depiro bdew b’5 punti mingħajr risposta però hawn Hibs kellhom mument ieħor posittiv meta għamlu run ta’ 11-0 bejn Jackson u Demcesen. Depiro waqqfuhom b’basket ta’ Felix Uadiale però Hibs għamlu run oħra ta’ 10-2 bi trippla ta’ Cassar u għalqu t-taqsima b’vantaġġ ta’ 22 punt 70-48. L-aħħar sessjoni offriet total ta’ 50 punt maqsuma eżatt bejn iż-żewġ timijiet. Uadiale, Cornelius u Nikola Bozovic tħabtu għal Depiro però kull darba sabu r-risposta ta’ Hibs fosthom minn trippli ta’ Gouder u Elijah Simmons. Biż-żewġ timijiet ikomplu jirrispondu lil xulxin, Hibs setgħu iżommu l-vantaġġ u jieħdu r-rebħa fuq skor finali ta’ 95-73.

The Plaza Depiro: S. Galea 5, T. Reddish 16, J. Micallef, N. Zivkovic, L. Stefanovic 6, JP Schembri, A. Trapani 3, S. Kenely, C. Cornelius 20, F. Uadiale 10, M. Debattista, N. Bozovic 13.

Hibernians: N. Cassar 7, E. Simmons 10, A. Ajiboye 15, L. Farrugia 3, P. Stelmach 11, V.Kustudija, M. Gouder 8, D. Jackson 17, M. Attard 7, T. Gjurovski, I. Demcesen 17, S. Simic.

Referees: Gordon Barbara, Leonardo Silvero, Andre Attard.

Luxol Sherries Estates 83

Starlites Revive 91

(18-30)(23-31)(21-13)(21-17)

Wara nuqqas ta’ staġun, Starlites Revive se jerġgħu jkunu fil-finali tal-kampjonat u dan wara li għelbu lil Luxol 91-83 biex issa din se tkun ir-raba’ finali bejn Starlites u Hibernians f’dan l-istaġun. Starlites fetħu vantaġġ importanti kmieni, b’mod partikolari fl-ewwel nofs fejn waslu sa 20 punt minn fuq, u minkejja r-reazzjoni ta’ Luxol fit-tielet sessjoni, irnexxielhom iżommu l-vantaġġ sal-aħħar. Id-differenza kienet prinċipalment fil-punti minn turnovers u fil-fast break, fejn Starlites sfruttaw aħjar it-transizzjoni biex jibnu u jżommu l-vantaġġ. Luxol ippruvaw jerġgħu jidħlu fil-logħba fit-tieni nofs u naqqsu d-distakk għal diversi drabi, iżda Starlites għalqu l-partita b’kontroll tajjeb tal-pussessi finali. Starlites ħarġu b’difiża agressiva u attakk veloċi tant li wara ftit inqas minn erba’ minuti kienu diġa 18-4 minn fuq bi trippli minn Jackson Threadgill, Kurt Xuereb u Alec Felice Pace. Luxol ġew f’tagħhom wara bidu diffiċlu u għanlu run ta’ 9-2 bi trippla ta’ Xavier Brewer u punti minn Darron Howard. Starlites però malajr irkupraw u għamlu break ta’ 10-0 bi trippla ta’ Miguel Fabri għalkemm fl-aħħar nofs minuta Luxol għamlu 5 punti bi trippla ta’ Nathan Xuereb għal skor ta’ 18-30. Fit-tieni perjodu Starlites kellhom run oħra ta’ 14-3 bi Threadgill ikompli jżid il-punteġġ flimkien ma’ trippla ta’ Travis Fee. Luxol ippruvaw jibqgħu viċin b’aktar trippli minn Xuereb u punti ta’ Howard u Mark Iloube iżda Starlites permezz ta’ runs qosra żammew vantaġġ sod. Luxol għalqu din it-taqsima kif għalqu l-ewwel waħda, b’5 punti mingħajr risposta għal skor ta’ 41-61.

Sar-raba’ minuta tat-tielet perjodu, Starlites dehru fil-kontroll totali tal-partita meta saħansitra kabbru l-vantaġġ għal 26 punt 72-46 wara punti minn Musa Jallow u Matthew Scerri. Hawn però Luxol għamlu sforz qawwi u għaqqdu break ta’ 16-2 bi trippli ta’ Xuereb u Howard u l-punti ta’ Iloube u Adam Azzopardi biex naqqsu d-distakk sa’ tmiem it-taqsima 62-74. Luxol komplew inaqqru mil-vantaġġ ta’ Starlites bl-ewwel 5 punti tal-aħħar sessjoni mill-ġdid grazzi għal Azzopardi. Hawn Threadgill kien providenzjali għal Starlites hekk kif mexxa run ta’ 7-2 li tathom vantaġġ b’figuri doppji. Luxol ma ċedewx bl-insistenza ta’ Howard u Iloube u għal darbtejn waslu sa’ seba’ punti ‘l bogħod. A. Felice Pace kiseb trippla u free-throws importanti qabel foul inutli u anti-sportiv ta’ Jallow fuq Nathan Xuereb bil-captain ta’ Luxol kostrett iħalli l-court f’ħin kruċjali. Starlites għalqu bil-punti ta’ Felice Pace biex rebħu l-partita 91-83.

Luxol Sherries Estates: D. Howard 27, A. Azzopardi 11, I. Azzopardi 2, N. Xuereb 14, J. Johnson 2, M. Brincat, M. Iloube 10, X. Brewer 16, S. Cappello 1.

Starlites Revive: A. Felice Pace 14, K. Fabri, T. Fee 14, A. Aquilina, S. Pace, I. Felice Pace 3, M. Fabri 3, M. Scerri 11, J. Iturmendi 6, J. Threadgill 28, K. Xuereb 2, M. Jallow 9.

Referees: Bernard Vassallo, Miguel Pablo De Flavia, Jacques Seifert.