Il-Qorti tal-Maġistrati, preseduta mill-Maġistrat Yana Micallef Stafrace, illiberat lil Roger Steven Duran Torres, Kolumbjan ta’ 36 sena, minn kull akkuża ta’ falsifikazzjoni u dikjarazzjonijiet foloz relatati ma’ applikazzjoni għal permess ta’ residenza.
Il-każ kien jikkonċerna allegazzjonijiet li l-imputat ressaq dokumenti foloz, inkluż kuntratt ta’ kera, lill-Aġenzija Identità Malta sabiex jikseb status legali ta’ residenza. Il-Prosekuzzjoni argumentat li d-dokumenti kienu ġew manipulati jew miksuba b’mod irregolari.
Madankollu, waqt il-proċeduri, ix-xhieda indikaw li l-kuntratt inkwistjoni kien ġie ppreżentat bħala parti mill-applikazzjoni għal single permit u li l-proċess kien jinvolvi dokumentazzjoni sottomessa permezz ta’ sistemi uffiċjali. Ix-xhieda spjegaw ukoll kif il-kuntratt tal-kiri kien ġie kkontestat mill-allegat sid, li sostna li qatt ma kien iffirma jew għaraf lill-imputat.
Il-Qorti osservat li, għalkemm id-dokumenti kienu ġew identifikati bħala problematiċi mill-awtoritajiet amministrattivi, ma kienx hemm prova suffiċjenti li l-imputat kien konxju li dawn kienu foloz jew manipulati. Il-Qorti enfasizzat li ma ġie ppreżentat l-ebda espert biex jikkonferma b’mod tekniku l-falsifikazzjoni allegata.
Fid-deċiżjoni tagħha, il-Qorti qalet li l-Prosekuzzjoni ma rnexxilhiex tipprova l-element ta’ intenzjoni kriminali (mens rea) lil hinn minn kull dubju raġonevoli, u għalhekk l-akkużi ma ġewx sostnuti bil-livell ta’ prova meħtieġ fil-liġi kriminali. Għaldaqstant, il-Qorti ddikjarat lill-imputat mhux ħati u lliberatu minn kull akkuża u piena relatata mal-każ.
