Il-qorti nhar il-Ħamis semgħet xhieda minn tobba, uffiċjala tal-pulizija u esperti forensiċi dwar il-ġrieħi, l-evidenza tad-DNA u s-sitwazzjoni makabra wara ġlieda f’Marsalforn, hekk kif tkompli l-ġurija dwar id-delitt vjolenti ta’ Fawaz Najem.
L-evidenza medika u forensika kienet il-qalba tas-seduta sħiħa, fejn diversi tobba, pulizija u esperti xehdu fil-ġuri kontra Maher Aljasem, u tefgħu aktar dawl fuq il-ġrieħi li seħħew waqt l-kunflitt fatali.
Is-seduta, wara l-waqfa ta’ wara nofsinhar, fetħet bix-xhieda ta’ Dr Psaila, tabib fiċ-Ċentru tas-Saħħa tar-Rabat f’Għawdex, li kkonferma li fid-9 ta’ Mejju 2022 il-pulizija talbuh joħroġ ċertifikat mediku dwar ġrieħi li kien eżamina jumejn qabel.
Huwa qal lill-qorti li għall-ħabta tal-11:45pm tas-7 ta’ Mejju kien evalwa lill-akkużat Maher Aljasem, fejn innota ferita fuq in-naħa tax-xellug tar-ras fuq wara, fejn l-akkużat qal li kienet ikkawżata minn gidma ta’ kelb. Osserva wkoll abbrażjoni fuq dirgħajh, fuq in-naħa tax-xellug, inkluż żona fejn kienet tqaċċtet il-ġilda taħt il-minkeb. L-akkużat qal li din kienet ikkawżata minn daqqa ta’ oġġett, iżda ma speċifikax x’tip ta’ oġġett u lanqas ikkonferma jekk kinetx ikkawżata minn persuna oħra.
Il-ġrieħi kienu deskritti bħala ħfief fejn intqal li l-akkużat ingħata vaċċin kontra t-tetnu u antibijotiċi, u ntalab jirritorna għal kura oħra. Meta mistoqsi dwar in-natura tal-ferita fuq dirgħajh, spjega li għalkemm ma setax jiddetermina b’ċertezza kif kienet ikkawżata, il-ferita kienet konsistenti ma’ oġġett. Ma sar l-ebda kontro-eżami.
Il-qorti mbagħad semgħet lil Dr Julian Portelli, li kien fuq xogħol fid-dipartiment tal-emerġenza fl-Isptar Ġenerali ta’ Għawdex dak il-lejl. Huwa ddeskriva kif evalwa individwu inizjalment mhux identifikat, għall-ħabta tal-11pm, li kellu ferita miftuħa f’rasu, fejn kellu bżonn il-punti. Hu kellu wkoll abbrażjonijiet fuq irkopptejh, saqajh u fuq naħa minnhom tal-ġisem. CT scan ma wriet l-ebda ġrieħi interni, u l-ġrieħi kienu deskritti bħala ħfief. Aktar tard l-persuna kienet identifikata bħala Ahmed.
Dr Portelli eżamina wkoll lill-akkużat, fejn identifika tliet ġrieħi, inklużi tnejn fuq wara tar-ras, abbrażjonijiet fuq l-għonq u l-ispalla, u tbenġil fuq saqajh il-leminija. Huwa kkonferma li l-ġrieħi dehru friski iżda ma nstabux ġrieħi interni jew ksur.
Il-Kuntistabbli tal-Pulizija Vassallo mbagħad xehed li ssejjaħ ġewwa residenza f’Marsalforn għall-ħabta tad-9:30pm wara rapporti ta’ ġlieda kbira. Malli wasal, ra ambulanza titlaq u osserva ammont sew ta’ demm minn ġewwa l-bieb tar-residenza, għalkemm ma setax jiddetermina minn fejn ġie.
Huwa ddeskriva kif ra persuna midruba toħroġ mir-residenza u tkaxkar lilha nnifisha mal-art u tokrob bl-uġigħ. Issejħet ambulanza fuq il-post u l-persuna ttieħdet l-isptar. Il-kuntistabbli kkonferma li r-residenza magħrufa bħala “Maria” kienet maisonette fil-livell tat-triq, li l-bieb kien miftuħ, u li kien hemm demm kemm fuq in-naħa ta’ ġewwa kif ukoll fuq in-naħa tal-bankina barra.
Il-Kuntistabbli George Scicluna rifes fuq il-pedana tax-xhud ukoll, fejn stqarr li ġie inkarigat biex joqgħod għassa ma’ vettura tal-għamla BMW ħdejn il-kamra mortwarja li tagħmel mal-isptar t’Għawdex, flimkien mas-Surġent Spiteri li akkumpanja lill-espert Mario Scerri l-isptar.
Is-Surġent Gatt xehed ukoll li kien intalab jiġbor id-dokumenti ta’ identifikazzjoni tal-vittma mingħand qraba u jgħaddihom lill-investigaturi.
Il-qorti semgħet ukoll lix-xhud Dr Marisa Cassar, spiżjara li tanalizza evidenza tad-DNA u fluwidi tal-ġisem. Hija spjegat il-proċess tal-profiling tad-DNA u kkonfermat li eżaminat diversi oġġetti, inkluż sikkina li ngħatat lilha fid-9 ta’ Mejju 2022. Għalkemm instabu traċċi ta’ demm fuq is-sikkina, l-ammont kien limitat u ma setgħatx tiddetermina jekk kinetx tnaddfet minn terzi persuni.
Din il-ġimgħa, il-qorti semgħet kif il-pulizija sabu inizjalment lill-akkużat bilqiegħda fuq it-taraġ quddiem daru f’Marsalforn magħrufa bħala “Maria”. L-uffiċjala taw verżjonijiet differenti dwar jekk il-bieb kienx miftuħ, iżda kkonfermaw il-preżenza tad-demm u li l-vittma kien diġà miet meta wasal l-isptar.
Il-ġurati raw ukoll filmati minn CCTV u mobiles, fejn intwera filmat ta’ ġlieda vjolenti bejn diversi individwi u l-użu ta’ oġġetti waqt il-ġlieda dakinhar filgħodu. Il-pulizija ddeskriviet sinjali ta’ ġlieda fuq il-post filgħaxija, inkluż għamara miksura u fdalijiet imxerrda, filwaqt li l-akkużat deher midrub iżda kalm.
Xhieda ta’ persuna li kienet tirrisjedi mal-akkużat spjegat kif grupp ta’ rġiel waslu fir-residenza, wieħed minnhom b’kanna tal-ħadid, fejn allegatament attakkaw lil oħrajn ġewwa r-residenza qabel ma eskalat is-sitwazzjoni. Huwa qal li ssawwat minn diversi individwi u ntilef minn sensih.
L-investigaturi kkonfermaw ukoll li l-arma użata fil-qtil qatt ma nstabet. Għalkemm nstabu diversi skieken fir-residenza, l-ebda waħda ma ntrabtet b’mod konklussiv mal-ferita fatali. Ix-xhieda taw verżjonijiet differenti tal-inċident, b’uħud jiddeskrivu ġlieda bejn diversi individwi u oħrajn isostnu li ħaddieħor daħal illegalment fil-proprjetà. Matul l-interrogazzjoni, l-akkużat sostna li safa’ attakkat u li seta’ laqat lil xi ħadd waqt li kien qed jiddefendi ruħu.
F’xhieda ta’ nhar il-Ħamis filgħodu, l-espert forensiku Mario Scerri qal lill-qorti li “il-mewta ma kinitx waħda naturali, iżda waħda vjolenti”. Spjega li Fawaz Najem sofra feriti ta’ sikkina f’sidru ta’ madwar 1.9ċm li ppenetrwaw il-qalb, konsistenti ma’ arma li taqta’ u bil-ponta. Il-feriti wrew sinjali ta’ “effett ta’ rocking”, u dan jindika li waqt l-att, l-aggressur seta’ dawwar idejh jew inkella nħasad, u meta s-sikkina nġibdet lura kkawżat leżjoni differenti.
Fawaz Najem, ċittadin Sirjan ta’ 25 sena li kien ġie Malta wara li ħarab minn gwerra ċivili, miet minn xokk ipovolemiku kkawżat minn ferita ta’ sikkina fis-sider li ppenetrat il-qalb.
L-avukati Angele Vella u Cynthia Tomasuolo qed imexxu l-prosekuzzjoni f’isem l-Avukat Ġenerali. L-avukati Peter Fenech, Elena Fenech u Amy Zahra qed jidhru għall-akkużat, filwaqt li Franco Debono u Matthew Xuereb qed jirrappreżentaw lill-familja tal-vittma.
