Il-Kamra tal-Kummerċ tilqa’ r-Regolamenti dwar l-Akkomodazzjoni tat-Turiżmu bħala pass pożittiv lejn it-titjib tal-kwalità tal-esperjenza tal-viżitaturi, filwaqt li tħeġġeġ integrazzjoni aktar armonjuża tat-turiżmu li tnaqqas it-tfixkil fil-komunitajiet lokali.
Fi stqarrija l-Kamra tal-Kummerċ qalet li tilqa’ wkoll l-approċċ ġdid li jirrikjedi lill-Awtorità Maltija tat-Turiżmu biex tivvaluta mhux biss il-konformità teknika iżda wkoll kif il-proposti jżidu l-valur, itejbu l-esperjenzi tal-viżitaturi, u jallinjaw mal-miri nazzjonali tal-klima u s-sostenibbiltà – bidla strutturali pożittiva fid-deċiżjonijiet ta’ liċenzjar.
Il-marki u l-kategoriji distinti tal-akkomodazzjoni huma wkoll suċċess ieħor. Is-suq turistiku Malti huwa wieħed divers, b’tipoloġiji li jservu segmenti, aspettattivi u proposti ta’ valur differenti. Dan l-approċċ jallinja r-regolamenti mar-realtajiet tas-suq u jsaħħaħ l-istandards tal-kwalità f’kull livell. Iċ-ċertifikazzjoni ekoloġika obbligatorja għall-akkomodazzjonijiet kollettivi tagħmel is-sostenibbiltà kundizzjoni ewlenija, mhux biss għodda ta’ kummerċjalizzazzjoni.
L-abolizzjoni tal-politika li tippermetti żewġ sulari żejda għal-lukandi hija wkoll rikonoxxuta. F’dan il-kuntest, il-Kamra tenfasizza l-ħtieġa għal Pjan Strateġiku aġġornat għall-Ambjent u l-Iżvilupp (SPED), li hu l-qafas ewlieni ta’ Malta għall-użu tal-art, l-iżvilupp u l-immaniġġjar ambjentali. SPED aġġornat għandu jħares lejn l-allinjament tal-politiċi kollha tal-ippjanar u l-leġiżlazzjoni relatata, u jiżgura li l-iżvilupp jassorbi l-istorja, il-kultura u l-ambjent naturali tagħna, billi joħloq pajsaġġi urbani, suburbani, ta’ brownfield, rurali u kostali li jirriflettu l-uniċità tagħna – u b’hekk jittraduċi f’mudell ta’ valur veru.
Ir-regolamenti jintroduċu wkoll miżuri aktar b’saħħithom għall-kiri għal żmien qasir: pieni aktar ħorox għall-operazzjonijiet mingħajr liċenzja, responsabbiltajiet aktar ċari għall-hosts, u ġestjoni tal-iskart marbuta mal-liċenzjar. Dawn jindirizzaw kwistjonijiet li ilhom jissemmgħu mill-komunitajiet, l-operaturi u l-partijiet interessati għal snin twal. Dan kollu jallinja mad-dokument Rediscover to Align li l-Kamra ippubblikat riċentement bi 115-il rakkomandazzjoni. Huwa jippromwovi l-valur, is-sostenibbiltà, l-awtentiċità u l-koordinazzjoni tal-politika fuq tkabbir imqanqal mill-volum.
Madankollu, ir-riforma fl-akkomodazzjoni hija biss ħolqa waħda fil-katina twila tat-turiżmu. Il-valur veru jitlob azzjoni wkoll fuq it-trasport, il-kundizzjonijiet tal-ħaddiema, il-liċenzjar tal-operaturi turistiċi, aktar koordinazzjoni regolatorja bejn l-awtoritajiet, u appoġġ aktar effettiv lin-negozji.
Il-Kamra tħeġġeġ lill-Gvern biex jara dawn ir-regolamenti mhux bħala l-linja finali, imma bħala l-bidu ta’ riformi usa’. Wasal iż-żmien li jiġu implimentati l-bqija tal-ideat ta’ Rediscover to Align, u Malta tkun tista’ toffri valur ogħla, reżiljenza, esperjenzi turistiċi superjuri u kwalità ta’ ħajja aħjar għar-residenti.
