Il-Qorti, ippreseduta mill-Imħallef Lawrence Mintoff, ċaħdet appell magħmul minn Malcolm Grech kontra s-sentenza tat-Tribunal ta’ Reviżjoni Amministrattiva tal-20 ta’ Marzu, 2025, li kienet ċaħdet it-talbiet tiegħu u kkonfermat id-deċiżjoni tal-Awtorità għat-Trasport f’Malta.
Il-kawża tirrigwarda revoka immedjata tal-liċenzja tal-appellant bħala operatur u ttestjar tal-VRT u l-impożizzjoni ta’ multa amministrattiva ta’ €22,000, wara allegazzjonijiet relatati ma’ irregolaritajiet fit-testijiet ta’ vetturi.
L-appellant sostna li ġie mċaħħad mid-dritt għal smigħ xieraq, li ma ngħatax opportunità jwieġeb qabel ittieħdet id-deċiżjoni, u li ma ġewx identifikati b’mod ċar il-vetturi jew ir-riżultati allegatament irregolari. Huwa argumenta wkoll li l-proċedura kienet tmur kontra l-prinċipji tal-ġustizzja naturali u li l-provi tekniċi kienu ġew interpretati ħażin.
L-Awtorità appellata sostniet li l-proċedura kienet korretta u skont il-liġi, u li kienet ibbażata fuq analiżi ta’ testijiet li wrew irregolaritajiet serji fl-operat tal-appellant, inkluż għadd ta’ vetturi li jew għaddew b’mod irregolari mit-testijiet jew kellhom nuqqasijiet fit-testijiet tal-emissjonijiet u l-ħoss.
It-Tribunal kien diġà kkonkluda li, minkejja li l-awtorità mhijiex qorti jew tribunal ġudizzjarju, il-proċedura amministrattiva kienet waħda validu u li l-appellant kellu opportunità suffiċjenti biex jappella u jressaq il-każ tiegħu.
Il-Qorti qieset li l-prinċipju tal-audi alteram partem ma kienx miksur, peress li l-appellant ingħata opportunità jressaq il-verżjoni tiegħu kemm quddiem it-Tribunal kif ukoll f’laqgħa sussegwenti mal-awtorità. Ġie enfasizzat li d-deċiżjoni amministrattiva ma kinitx finali fis-sens ġudizzjarju, peress li kienet suġġetta għal appell.
Fuq il-mertu tekniku, il-Qorti sabet li l-provi kienu juru inkonsistenzi serji fl-operat tal-appellant, inkluż in-numru għoli mhux realistiku ta’ testijiet f’ġurnata, u irregolaritajiet f’diversi vetturi fir-rigward tal-emissjonijiet u l-livelli tal-ħoss. Il-Qorti qieset ukoll li l-ispjegazzjonijiet tal-appellant dwar difetti fl-apparat jew karatteristiċi tal-vetturi ma kinux kredibbli jew sostnuti bi provi suffiċjenti.
Għaldaqstant, il-Qorti kkonkludiet li t-Tribunal għamel evalwazzjoni korretta tal-provi u tal-aspetti tekniċi, u li ma kienx hemm żball li jiġġustifika intervent ġudizzjarju. Għaldaqstant il-Qorti ċaħdet l-appell ta’ Malcolm Grech u kkonfermat fis-sħiħ is-sentenza tat-Tribunal. L-ispejjeż tal-appell ġew ordnati kontra Grech.
