Żagħżugħ ta’ 23 sena nżamm arrestat wara li tressaq il-Qorti akkużat flimkien ma’ raġel ieħor b’reati serji ta’ stupru li allegatament seħħew f’kantina ta’ ħanut f’San Ġwann.
Iż-żewġ imputati huma Abdulmomen H M Abudagil, ta’ 23 sena, u Jordan Azzopardi ta’ 36 sena, magħruf bħala “El Chapo”. Huma qed jiġu akkużati li wettqu stupru, serq, ġrieħi ta’ natura gravi fuq il-ġisem u li żammew lil vittma kontra r-rieda tiegħu.
Skont il-prosekuzzjoni, il-każ seħħ fil-21 ta’ April għall-ħabta tat-7:45pm meta l-vittma daħal f’ħanut fi Triq in-Naxxar, San Ġwann. Il-ħanut huwa proprjetà ta’ Abudagil, li allegatament ħa lill-vittma fil-kantina tal-ħanut fejn seħħ l-attakk.
Fil-kantina, Abudagil flimkien ma’ Azzopardi allegatament aggredew lill-vittma u kkawżawlu ġrieħi gravi. Ġie allegat ukoll li serquh u li abbużawh sesswalment billi ppenetrawh b’oġġett. Il-Qorti semgħet kif il-vittma rnexxielu jaħrab mill-post, iżda aktar tard kellu jiddaħħal l-isptar minħabba l-ġrieħi li sofra.
Iż-żewġ imputati ġew arrestati u tressqu quddiem il-Maġistrat Abigail Critien. L-arrest tagħhom ma ġiex ikkontestat u t-tnejn wieġbu mhux ħatja għall-akkużi miġjuba kontrihom.
Filwaqt li Azzopardi ma talabx il-ħelsien mill-arrest, Abudagil ressaq talba għal bail. Il-prosekuzzjoni oġġezzjonat għal din it-talba, billi sostniet li hemm riskju li l-imputat jinterferixxi mal-provi jew jaħrab mill-pajjiż, speċjalment fid-dawl tal-allegazzjoni li hedded lill-vittma li jaħrab lejn il-Libja jekk dan jaħrab.
Id-difiża ta’ Abudagil argumentat li dan ir-riskju ma jeżistix, billi indikat li missieru lest jilqgħu għandu jekk jingħata l-ħelsien mill-arrest. Sostniet ukoll li għandu rabtiet qawwija ma’ Malta, fejn ilu jgħix għal aktar minn 14-il sena, għandu proprjetà u jopera negozju. Id-difiża enfasizzat ukoll li l-imputat għandu rekord kriminali nadif u li għadu żagħżugħ.
Madankollu, il-prosekuzzjoni sostniet li n-natura u s-serjetà tal-akkużi għandhom jingħataw piż akbar, u li l-imputat qed jiffaċċja akkużi serji ħafna.
Wara li semgħet iż-żewġ naħat, il-Qorti ċaħdet it-talba għall-ħelsien mill-arrest ta’ Abudagil u ordnat ukoll protezzjoni favur il-vittma fuq talba tal-prosekuzzjoni.
Il-każ kien presedut mill-Maġistrat Abigail Critien. Għad-difiża dehru Franco Debono, Adreana Zammit u Matthew Xuereb, filwaqt li l-prosekuzzjoni tmexxiet mill-Ispetturi Wayne Buhagiar u James Turner.
