Il-Ministru għall-Affarijiet Barranin tal-Iran, Abbas Araghchi, jinsab fil-Pakistan għal sensiela ta’ taħditiet ma’ uffiċjali ewlenin tal-pajjiż, f’kuntest ta’ tensjoni persistenti fir-reġjun. Minkejja li delegazzjoni Amerikana mistennija tasal ukoll, sorsi Iranjani sostnew li bħalissa m’hemm l-ebda pjan għal laqgħat diretti bejn Tehran u l-Stati Uniti.
Skont kelliema għall-Ministeru tal-Affarijiet Barranin Iranjan, iż-żjara ta’ Araghchi tifforma parti minn tour diplomatiku usa’, li jinkludi wkoll żjarat ippjanati lejn Oman u Russja. Rapporti fil-midja Iranjana jissuġġerixxu li Islamabad tista’ sservi ta’ mezz indirett ta’ komunikazzjoni bejn iż-żewġ naħat, b’għan li jitnaqqsu t-tensjonijiet u jiġu esplorati opportunitajiet diplomatiċi.
Matul iż-żjara tiegħu, Araghchi diġà kellu laqgħat ma’ mexxejja prominenti Pakistani, fosthom il-Prim Ministru Shehbaz Sharif u l-kap tal-armata Asim Munir. Id-diskussjonijiet iffukaw fuq l-iżviluppi reċenti relatati mal-waqfien mill-ġlied, fejn l-Iran ippreżenta l-pożizzjoni tiegħu u enfasizza l-importanza li jkompli d-djalogu diplomatiku.
Min-naħa tagħha, il-White House ħabbret li l-mibgħut speċjali Amerikan Steve Witkoff u Jared Kushner se jmorru fil-Pakistan fi tmiem il-ġimgħa biex jiddiskutu s-sitwazzjoni. Ġie rrappurtat ukoll li l-Viċi President JD Vance jinsab lest li jingħaqad mat-taħditiet jekk ikun hemm bżonn.
Madankollu, minkejja dawn il-movimenti diplomatiċi, il-prospetti għal progress konkret jibqgħu inċerti. Il-kunflitt fuq il-post għadu attiv, speċjalment bejn l-IDF u Hezbollah, li komplew jiskambjaw akkużi dwar ksur ta’ ftehim ta’ waqfien mill-ġlied estiż reċentement.
Osservaturi internazzjonali jemmnu li, għalkemm il-Pakistan jista’ jkollu rwol ta’ medjatur indirett, id-differenzi politiċi bejn l-Iran u l-Istati Uniti jibqgħu sfida kbira. Izda għalissa, jidher li l-isforzi qed jiffukaw aktar fuq kuntatti indiretti u koordinazzjoni diplomatika milli fuq negozjati diretti.
