It-tielet rebħa konsekuttiva għal Antonelli

Kimi Antonelli rebaħ il-Grand Prix ta’ Miami b’wirja stupenda f’dik li kienet it-tielet rebħa konsekuttiva li permezz tagħha saħħaħ postu fil-quċċata tal-Klassifika tas-Sewwieqa. Iż-żagħżugħ ta’ Mercedes kellu jirreżisti l-pressjoni ta’ Lando Norris li baqa’ sal-aħħar dawra jipprova jikseb ir-rebħa.

F’bidu pjuttost drammatiku, Antonelli kellu pressjoni minn Max Verstappen u Charles Leclerc fl-ewwel kantuniera, l-istess kantuniera li fiha Antonelli u Verstappen blokkaw il-brejk. Imbagħad Verstappen għamel kuntatt ma’ Leclerc, bis-sewwieq ta’ Red Bull spiċċa dar dawra sħiħa bil-karozza iżda mirakolożament irnexxielu jżomm il-karozza fiċ-ċirkwit.

Sal-ewwel mumenti, Leclerc kien jinsab fuq quddiem iżda l-ewwel post inbidel diversi drabi, b’Antonelli qabeż lil Leclerc ftit wara. Norris, Oscar Piastri u Verstappen ukoll kellhom perjodu fil-quċċata, b’tal-aħħar daħal jibdel it-tyres kmieni f’mossa differenti biex ipprova jċaqlaq il-klassifika personali. Dan wara li kellha toħroġ is-Safety Car wara inċidenti separati għal Isack Hadjar ta’ Red Bull u Pierre Gasly ta’ Alpine fl-istess dawra.

Aktar ma għadda l-ħin, il-battalja saret bejn Antonelli u Norris. Is-sewwieq ta’ Mercedes irnexxielu jibqa’ kalm u qasam il-linja finali fl-ewwel post b’vantaġġ ta’ 3.264 sekondi fuq Norris. B’hekk it-Taljan sar l-ewwel sewwieq li dawwar l-ewwel tliet Pole Positions fil-karriera fi tliet rebħiet.

Piastri kiseb it-tielet post fuq il-podju fl-aħħar dawriet wara battalja ma’ Leclerc. Sussegwentament, Leclerc tilef il-kontroll tal-karozza iżda baqa’ fit-tellieqa. Madankollu sofra minn ħsarat li wassal biex inqabeż minn George Russell u Verstappen fl-aħħar ftit metri tat-tellieqa. B’hekk Russell kiseb ir-raba’ post segwit minn Verstappen u Leclerc.

Lewis Hamilton temm fis-seba’ post f’dik li kienet ġurnata kwieta għalih. Franco Colapinto fuq Alpine temm fit-tmien post segwit mill-koppja ta’ Williams magħmula minn Carlos Sainz u Alexander Albon li komplew l-ewwel għaxra.

Il-Grand Prix li jmiss issir il-Ħadd 24 ta’ Mejju fiċ-ċirkwit ta’ Montreal fil-Kanada.